'Daxwazên girtiyan qebûl bikin'

2017-04-08 14:51:57

STENBOL -  Di çalakiya Tîpa F de vê hefteyê azadiya girtiyê nexweş Fahrî Işik hat xwestin, bal kişandin li ser grevên birçîbûnê û wiha hat gotin: "Ji bo ku 3 daxwazên esasî yên girtiyan bên qebûlkirin, mirin û seqetî çênebin divê serlêdanên me bên qebûlkirin."

Komîsyona Girtîgehan a Komeleya Mafê Mirovan (ÎHD) a Stenbolê ji bo balê bikişîne li ser rewşa girtiyên nexweş li Qada Galatasarayê çalakiya Tîpa F a 263'emîn li dar xist.  Di çalakiyê de pankartên "Tecrîd dikuje, bila girtîgehên Tîpa F bên girtin" "Tecrîd dikuje piştevanî dide jiyandin" "Bila Fahrî Işik bê berdan" hatin vekirin. 

Di çalakiya vê hefteyê de ÎHD'ê bal kişand li ser girtiyê nexweş Fahrî Işik ê  pençeşêr e û hat xwestin bê berdan. 

 Nûnera Weqfa Mafên Mirovan a Tirkiyeyê (TÎHV) a Stenbolê Umît Efe di axaftina xwe ya bal kişand li ser grevên birçîbûnê yên li girtîgehan û got ku ew hewl didin ku bibin  dengê girtiyan û wiha axivî: "Ji bo riya dilalog û çareseriyê bê vekirin ji bo ku 3 daxwazên esasî yên girtiyan bên qebûlkirin, mirin û seqetî çênebin divê serlêdanên me bên qebûlkirin."

Ji Komîsyona Girtîgehan a ÎHD'ê Meryem Bor jî di daxuyaniya  hefteyê de  bal kişand li ser referanduma ku nêzîk dibe  û got ku pêkûtiya li ser muxalîfan zêde dibe.