Yuksekdag û Demîrtaş peyama piştgiriyê ji Nobetê re şandin

2017-07-29 12:59:37

NAVENDA NÛÇEYAN - Hevseroka Giştî ya HDP'ê ya berê Fîgen Yuksekdag û Hevserokê Giştî yê HDP’ê Selahattîn Demîrtaş ji girtîgehên lê dimine  peyama piştgiriya nobeta şand. 

Hevseroka Giştî ya HDP'ê ya berê ku wekîltiya wê hat xistin Fîgen Yuksekdag û Hevserokê Giştî yê HDP'ê Selahattîn Demîrtaş peyama piştgiriyê ji çalakgerên Nobeta Edalet û Wîjdan re şandin. 

Peyama Yuksekdag wiha ye:

“Em li hundir hûn jî li derve em ê heta dawiyê vê berxwedana rûmetê bidomînin. Yên ku êrîşî vîna siyasî ya milyonan dikin wê têk biçin. Yên ji têkoşînê narevin û nasekinin wê faşîzmê bidin sekinandin. Nobeta berxwedanê ya li Amedê, nîşaneke nû ya serkeftina me ye. Ev banga rûmet, edalet û wijdan e. Ez bawer dikim ku gelê me wê xwedî li îradeya xwe derkeve û li hemberî esaret û ablûqayê wê bersiveke xurt bide. Bi vê baweriyê di serî de jin ez li bang hemû gel û saziyên demokratîk dikim ku bila xwedîtiyê li nobeta wijdan û edaletê derkevin.”

DEMÎRTAŞ: DÊ FAŞÎZM TÊK BIÇE 

Peyama Demîrtaş jî wisa ye:

“Ez serkeftinê ji hevalên di nobeta wijdan û edaletê de ne, dixwazim.

Ez dixwazim bibêjim ku ev helwesta we bi wate û girîng e. Divê gelê me li her derê xwedîtiyê li vê nobetê bike. Ne bi tenê gelê Amedê, divê gelên me yên li Stenbol, Îzmîr, Antalya, Edene û Mêrsînê piştgiriya vê nobetê bike. Bi vê piştgiriya wan re wê faşîzm bi paş ve biçe.
Bi vê mebestê ez silav û hezkirinên xwe ji hemû hevalên berxwedêr ên li hundir û derve dişînim û ez dixwazim bibêjim ku ‘em ê teqez bi ser bikevin.”