Pîr: Erdogan dê nikaribe xwe ji van polîtîkayên şaş rizgar bike 

2017-08-23 10:04:43

AMED – Endamê Komîsyona Meclîsa Karên Derve Parlamenterê HDP’ê Ziya Pîr qeyranên di navbera welatên Ewropa û Tirkiyê yên di demên dawî de nirxand û got: “Erdogan li hundir û li derve polîtîkaya dijmanahiyê dide meşandin. Dê Erdogan nikaribe xwe ji vê polîtîkaya şaş rizgar bike.”

Di demên dawî de di navbera welatên Ewropa û Tirkiyê de qeyranên aborî û siyasî pêş dikeve. Bi taybetî jî di navbera Elmanya û Tirkiye de qirîzek mezin heye. Di navbera van her du welatan de her roj pirsgirêk û qeyranek nû diqewime. Ji bo warê çareseriyê jî heta niha tu îşaretek xuya nake. Endamê Komîsyona Meclîsa Karên Derve Parlamenterê HDP’ê yê Amedê Ziyar Pîr polîtîkaya Erdogan a derve rexne kir û got ku polîtîkaya Erdogan li derve û li hundir dide meşandin nikare welat birêve bibe û ev polîtîkaya pêşeroja Tirkiyê tarî dike. 

‘LI TIRKIYÊ POLÎTÎKAYA QIRÊJ DERDIKEVE HOLÊ’ 

Pîr destnîşan kir ku qeyranên di navbera welatên Ewropya bi taybetî jî Elmanya û Tirkiye piştî gefa penaberan dest pê kir û wiha got: “Di navbera Tirkiye û Elmanya qeyrana Baregeha Încîrlîkê jî çêbû. Elmanan leşkerê xwe ji Încîrlîkê vekişandin. Her çiqas qeyranên di navbera Tirkiye û Elmanya de qûr bû vê carê jî piştî hewldana darbeya 15’ê Tîrmehê binpêkirina mafan li Tirkiyê derket asata herî jor û hemwelatiyên biyanî û yên elman jî ji vê yekê para xwe girtin. Rojnameger Denîz Yucel û parêzvanê mafê mirovan ên ji Ewropa hatin girtin. Ji bo referanduma 16’ê Nîsanê Ewropa û Elmanya destûr neda mitîngên AKP’ê. Her ku çû qeyran jî bêtir kûrtir bûn. Tirkiye navê şirketên Elmanya ragihand Înterpolê got ku ev destekê didin terorê. Tirkiye bi vê gavê peşkê li her tiştî xist. Vê carê jî Elmanya bi zimanekê Tirkiye fêm bike axivî. Bi gefên razemaniya aborî Tirkiye lîsteyê paş de kişand. Tirkiye xwe lavayî Elmanya kir. Wek rûşvetê jî îhaleya enerjiye da şirketa Elman.” 

‘ERDOGAN LI HUNDIR Û LI DERVE DIJMINAHIYÊ DIK’ 

Pîr bal kişand ser polîtîka û gefên Erdogan ên li dijî Elmanya û wiha domand: “Serokomar Erdogan ji bo desthilat û dîktatoriya xwe bide meşandin dixwaze polîtîkaya dijmaniyê li hundirê welat bide avakirin. Erdogan li hundirê welat ji muxalîfan bigire heta hemû beşên civakê ya terorîst an jî dijmin daye îlankirin û dibine. Dixwaze li derveyê welat jî dijmaniyê bide afirandin. Erdogan, gef li şexsê Wezîrê Karê Derve yê Elmanya Sîgmar Gabrîel dixwe û êrîş dike. Piştî gef xwarinan Gabrîel got ‘Piştî gefên Erdogan hevjînê tê tacîzkirin.’ Erdogan viya bi zanebûn dike. Erdogan dixwaze polîtîyek yekperestî û qirêj bide meşandin. Li ser vê yekê jî dixwaze xwe bike qebede ye. Şêwazek ji siyasetê dûr dide maşandin. Kes bi viya naxape. Her roja ku diçe xelas dibe û dikeve riyek ne veger. Nizane dê çi bike. Ji ber vê yekê jî êrîş vir û wir dike. Erdogan viya ne ji bo Tirkiyek bi hêz dike wek siyasetmedarek tirsonek vê yekê dike.” 

‘MÎT LI EWROPAYÊ LI PEY MIROVAN E’ 

Pîr di berdewama axaftina xwe de behsa MÎT’ê kir û got ku MÎT li Ewropayê li pey mirovane û li ser mirovan zordestiyê pêk tîne. Pîr bal kişand ser desteka aboriyê ya Tirkiyê ku ji Ewropayê distîne û wiha lê zêde kir: “Bankaya Razemeniya Ewropa heye. Ji dema Tirkiye dest bi hevdîtinên muzakereyên yekîtiyê kiriye 25 milyan Euro pere sitendiye. Çima vê didin? Ji bo ku krîterên Ewropa bicih bîne, ji bo azadî û demokrasî pêk bên didin Tirkiyê. Niha jî Elmanya, Fransa û Îngîltere zextan li ser bankayê dike û ji ber Tirkiye krîterên Ewropa cih neaniye van pereyan bibire. Tê xuyakirin ku pereyên heta 2020’an dê bidana Tirkiye lê wê bê birîn. Ka em wê demê lê binêrin dê Erdogan çi bike? Wê dîsa van tevgerên xwe yên artîstî bike gelo? Dema herikîna pereyan bibirin dê dîsa Erdogan lavatiya Ewropayê bike.” 

‘ÇI DIKE BILA BIKE EM Ê JI ERDOGAN RIZGAR BIBIN’ 

Pîr nirxandina xwe bi van gotinan bi dawî kir: “Ev 2 sale em dibêjin darbeya sivîl heye. Lê kes naxwaze ji me bawer bike. Herî dawî gotina Gabrîel a ‘Erdogan darbeya xwe pêk tîne’ me mafdar derxist. Tirkiye rewşek trajîkomîk dijî. Tirkiye bi vê polîtîkaya xwe ya dijmanahiyê nagîhîje tu mexsedê xwe. Xwe ji bo hilbijartinek din amade dike. Ji bo vê yekê jî hem dixwaze xwe û hem jî partiya xwe rizgar bike. Dê Erdogan nikaribe xwe ji vê polîtîkaya şaş rizgar bike. Her çiqas li hundir tengav dibe li derve jî xeletiyan dike. Çawa ku li hundir polîtîkayek dijberiya kurdan dide meşandin bi heman rengî li derve jî polîtîkaya şaş dide meşandin. Siyasetmedarek li dijî referandûmê, li dijî kurdan, li dijî serxwebûnê, li dijî xweseriyê heye. Çi dike bila bike lê em ê di demek kurt de ji Erdogan rizgar bibin.”