ANTALYA - Esnafên li Çarşiya Kaleîçî ya Antalyayê, îsal jî hêviya xwe ji turîzmê birîn. Esnafên Kaleîçiya dîrokî diyar kirin ku, îsal hejmara turîstên ku ji Ewropayê dihatin ji sedî 82 ketiye.

Li Tirkiyeyê sala çûyîn, turîzm bi xisareke mezin serdem bihurandibû. Îsal jî heman rewş dixuyê û her wiha esnafan bi temamî hêviya xwe ji turîzmê biriye. Esnafên Çarşiya Kaleîçî ya dîrokî ya navçeya Mûratpaşa a Antalyayê, bêyî karekî bikin li kuçeyan rûdinên û hewl didin ku dem derbas bibe.

KUÇEYÊN KALEÎÇIYÊ VIKÎVALA NE

Li Kaleîçiya ku tim bala turîstan dikêşa, niha bi sedan dikanên ku amûrên diyariyê û tekstîlê difiroşin vikîvala ne. Li kuçeyan ji bilî çend turîstan hema bêje tu kes tune ye. Dema em ji esnafên li ber dikanên xwe rûniştine rewşa kar dipirsin, kuçeyên vala nîşan didin û wiha dibêjin: "Van kuçeyan bikişînin hûn ê fêm bikin ka kar çawa ye."

'JI SEDÎ 82 HEJMARA TURÎSTÊN EWROPAYÎ KÊM BÛYE'

Serdar Akdag ku 15 sal in li Kaleîçiyê barê dide xebitandin, balê kişand ser krîza 2016'an a di navbera Tirkiye û Rûsyayê û krîza 2017'an a bi welatên Ewropayê re û wiha got: "Dema pirsgirêkên bi welatên Ewropayê re jî li rageşiyên hundur zêde bûn, krîz kûrtir bû." Akdag, got ku dema mirov lê dinihêre hejmara turîstên ji Ewropayê dihatin ji sedî 82 kêm bûye. Akdag, anî ziman ku her çi qas behs dikin ku turîzm baş bûye jî, lê belê wan tu başî nedîtiye. Akdag, got ku sala 2016'an saleke zaf xerab bû û wiha axivî: "Dê 2017 jî ne kêmî 2016'an be."

‘BI AŞTIYÊ DÊ REWŞA TURÎZMÊ BAŞ BIBE'

Yek ji esnafên Kaleîçiyê Ahmet Koç jî, dest nîşan kir ku dema ew li rêjeya firotinê ya sala çûyîn dinihêre îsal bêtir ketiye. Koç, anî ziman ku sala çûyîn hema bêje her roj 100 turîst di nav Kaleîçiyê re derbas dibûn û wiha got: "Îsal ne turîstek, êdî mirov di kuçeyan re derbas nabin." Koç, dest nîşan kir ku ji ber siyaseta dervey ay îktîdarê aboriya hundurîn zirar dîtiye û her diçe krîza aborî kûrtir dibe. Koç, dest nîşan kir ku çareseriya başbûna turîzmê jî bi aştiyê pêkan e û wiha axivî: "Divê demildest hem aştiya navxweyî pêk bê û hem jî têkiliya bi welatên din re baş bibe."