MÊRSÎN- Seravanên bajaroka Kazanliyê anîn ziman ku serevanî ketiye nav lepên banka û selefxuran û wiha gotin: "Me her sal digot 'bihareke din', lê êdî ne em dikarin deynê komîsyonvanan, ne yê selefxuran û ne jî yên bankeyan bidin. Ji bo cotkaran serevanî qediyaye."

Li bajaroka Kazanli ya navçeya Akdenîz a Mêrsînê cotkarên ku bi seravaniyê debara xwe dikin, ji ber lehiyên îsal zêde xisirîn. Seravanan anî ziman ku ew bi deyndarî serevaniyê dikin û êdî hatine wê astê ku nikarin deynê komîsyonvan, selefxur û bankeyan bidin û ji ber vê yekê ew ê dev ji serevaniyê berdin.

‘EV SERDEM FELAKET BÛ'

Cotkar Umit Oguz, anî ziman ku bi salane li bajaroka Kazanliyê dijî û nêzî 25 salan e ku serevaniyê dike. Oguz, diyar kir ku ji ber lehiya ku di zivistanê de li Mêrsînê rabû ew zaf xisirîne û wiha got: "Vê zivistanê sê caran lehî rabû. Ji ber lehiyê em zaf xisirîn û ji bo em berên xwe xelas bikin me gelek mesref kir û me dubare berên xwe çandin. Lê me tiştek ji wan jî qezenc nekir. Îsota ku me ji nû ve çand daket 50 qurişî. Me ew jî berhev kir, lê me nikaribû bifiroşe û me hişt ku sor bibe. Lê a sor jî me xelas nekir. Îsal me serê donimê 12 hezar mesref kir. Lê me serê donimê 10 hezar qezenc kir. Em zaf xisirîn. Êdî cotkarî em kuştin."

Ogûz, got ku êdî serevanî bi kêrî tu cotkarî nayê. Ogûz, anî ziman ku serevanî ji bo wan karekî girîng bû, lê belê êdî tu kes jê qezenc nake. Ogûz wiha domand: "Êdî ne em ne jî karkerên ku berhevkariyê dikin qezenc dikin. Li serayan êdî em nikarin heqê karkeran jî bidin. Me her sal digot 'bihareke din', lê êdî ne em dikarin deynê komîsyonvanan, ne yê selefxuran û ne jî yên bankeyan bidin. Ji bo em deynê xwe bidin hêviya me selefxur bûn. Ya me mala xwe ya jî me seraya xwe wek îpotek nîşan dida. Êdî em nizanin em ê çi bikin. Ji ber ez nikarim mala xwe bidim selefxuran mecbûr ez ê seraya xwe bifiroşim, da deynê xwe bidim. Niha deyndarê komîsyonvan, karker, banke û selefxura me."

'AKP KARKERAN HETA QIRIKÊ XIST NAV DEYNAN'

Aytaç Kûrtûlûş jî anî ziman ku ew endezyarê çandiniyê ye û ji sala 2002'yan heta niha serevaniyê dike. Kûrtûlûş, got ku beriya hikûmeta AKP'ê cotkarên serayê ji Bankaya Zîraaetê tenê serê dekarê kredî werdigirtin, lê belê di dema hikûmeta AKP'ê de her sal bi krediyên cuda cotkar tên deyndarkirin. Kûrtûlûş, anî ziman ku di nav 15 salên borî de krediyên wek bê faîz û bi faîzên kêm berpêşî cotkaran hatin kirin û bi vî awayî cotkar heta qirikê ketin nav deynan. Kûrtûlûş wiha axivî: "Niha li ser 8 hezar donim eraziyê min serê her donimê 8 hezar û 700 lîre kredî hatiye kişandin û ev kredî nayê dayîn. Her sal ji bo heqê krediyan bidim ez dibim deyndarê selefxuran. Ji ber vê yekê gelek cotkar erdên xwe firotin."

Kûrtûlûş wiha got: "Em cotkar ji bo nedizin, nebin muhtacê tu kesî em vî karî dikin. Lê êdî dikarim bêjim ku ji bo cotkaran serevanî qediyaye."