RIHA - Li Rihayê binavayiya çarşiya di nav platoya Gola Masiyan de ye 3 roj berê rûxiya. Ji ber rûxandinê turîstên biyanî û yên xwecihî nikarin serdana çarşiyê bikin. Esnaf li ber îflasê ne.
Li çarşiya Weqfa Lêkolînkirina Çanda Rihayê (ŞURKAV) ku di nav platoya Gola Masiyan de ye, 2 meh berê xebatên binavayiyî hatin destpêkirin. Ji ber van xebatan esnaf nikarin tu karî bikin. Li vê platoya ku gelek turîst serdana wê dikin, ew xebata binavayiyî 3 roj berê rûxiya. Esnafan diyar kir ku berpirsiyarên vê yekê ŞURKAV, Şaredariya Bajarê Mezin a Rihayê û mutehîd in.
ÊDÎ NIKARIN HEQÊ KIRÊ BIDIN
Esnafan anî ziman ku bêyî ku weqf projeya platoyê lêkolîn bike dest bi xebatan kiriye û molozên tadîlata li çarşiyê li ser tunelê hatine valakirin û ji ber vê yekê rûxiyaye. Esnafan, dest nîşan kir ku dê ev plan 15 meh şûnde biqede, lê belê ji bilî zirarê tu fêdeya wê li wan tune ye. Esnafê bi navê Erhan Karakeçili, got ku ew hatine wê astê ku êdî nikarin kirêyên dikanên xwe bidin û êdî turîstên xwecihî jî serdana çarşiyê nakin. Karkeçili, diyar kir ku ji ber îhmalkariya mutehîdan rûxandin çêbûye û wiha got: "Li vir tadîlatek hebû, bi tadîlatê re rûxiya. Kevir li vir vala dikirin. Me ew hişyar kirin, lê kesî guh neda me. Hindik mabû em di bin de bimanan. Em mexdûr bûn. Çimkî êdî kes nayê çarşiyê."
‘HEQÊ ÇAYA ME JÎ DERNAYÊ'
Emrah Kalin ku zîvkeriyê dike jî, got ku çarşî veguheriye qada înşeatê û ji ber vê kirîger nayên. Kalin, anî ziman ku dikaribûn bi awayekî din jî xebatê bi rê ve bibin û wiha domand: "Dikan di nav tozê de dimîne. Her meh 900 lîre heqê kirê didim. 500 lîre heqê ceryanê didim. Em bacê didin, lê tiştekî qezenc nakin. Danasîna çarşiyê jî nayê kirin. Lê ji bo pereyan qezenc bike şaredarî her tiştî dike. Yanî guhertina keviran be, şikandina dîwaran be demildest digire ser xwe. Ji weqfê heta şaredarî û walîtiyê em ji hemûyan gilîdar in. Em rojê bi 10 lîreyî diçin malê. Heqê çaya me dernakeve. Bû 2 meh hîn şaredarî beton nerijandiye. Serdem nebaş e. Malên me di dest me de dimînin. Lêçûn zêde ne, lê qezenc tune ye."
Yaşar Gulubag ku 50 sal e zirkeriyê dike, diyar kir ku ji wan re nehatiye gotin ku dê xebat heta kengî bidome û ji ber vê kirger nayên çarşiyê.
Esnafê bi navê Ayhan Yeşilyurt jî anî ziman ku li Tirkiyeyê krîza aborî heye û ew vê yekê hîs dikin. Yeşilyurt, dest nîşan kir ku dev ji kirîgeran berdin esnaf nikarin têkevin çarşiyê û dikanên tên vekirin jî di nav toz û duxanê de dimînin. Yeşilyurt, dest nîşan kir ku ev çarşî çarşiyeke turîstîk e, lê belê tabelayeke wê jî tune ye. Yeşilyurt got ku ji ber ku rayedar bi berpirsiyarî tevnagerin ew hatine asta ku derabeyên xwe deynin.
Esnafan diyar kir ku ew êdî nikarin kirêyên xwe bidin û ji bo ku kirê ji wan neyê stendin wan daxwazname dane Şaredariya Bajarê Mezin a Rihayê, lê belê şaredariyê qebûl nekiriye.