COLEMÊRG – Gundiyên Baleka di meha Tebaxê de ku dest bi berhevkirina hingiv dikin, ji bo aramîkirina meşan duxanê derdixin û kewaran yek bi yek raçav dikin.

Welatiyên li gundê Baleka Colemêrgê dijîn, her sal di meha Tebaxê de li mêşênhingiv dinêrin. Gundî li aliyekê ji bo aramîkirina meşan duxanê derdixin û li aliyê din jî kewaran yek bi yek raçav dikin. Bi vê yekê gundî amadekariyên dawî dikin.

BUHAYÊ HINGIVÊ HEQÎQ ZÊDE YE

Hasan Pala diyar kir ku ew di vê mehê de hingiv kom dikin û wiha axivî: “Ez ‘meşên Kafkas’ xwedî dikim.” Pala kewara ku jê re tarik dibêjin û tu made nakeve wê nîşa da û wiha got: “Ev hingivê hûn dibînin tu tişt di nav de tune ye hingivê heqîqî yê Colemêrgê ye. Qet şekir tevlî nav nebûye. Mêşa Kafkas pir hêmin û berhemdar e. Hingivê van mêşan bi 200-300 lîreyî tê firotin.”

MÎNA DERMAN TÊ BIKARANÎN

Pala da zanîn ku ew hingivekî xwerû hildiberînin û wiha got: “Em tiştekê tevlî nakin. Em her sal 500-600 kîlo hingiv hildiberînin. Gelê me hingivê heqîqî nas dike û li gelek cihan mîna derman tê bikaranîn.”

Pala bal kişand ser bandora hewayê ya li ser mêşan û wiha bilêv kir: “Her rengek cudahiyek xwe heye. Herêm û germahiya heyî, bandorê li jiyana mêşan dike. Li Botanê di meha Adarê de, meş çêdibin. Li vê herêmê jî di meha Gulanê de çêdibin. Heya dawiya meha Tirmehê mêş mezin dibin û hungiv didin. Di meha Tebax û Îlonê de hungiv tê berhev kirin.”

16 SAL E JI ORDÛYÊ TÊ COLEMÊRGÊ

Mahmut Keskîn ê 16 sal e ji Ordûyê tê Colemêrgê jî wiha axivî: “Bav û kalê min jî ev kar dikin. Gelek xizmên min jî tên herêmê û vî karî dikin. Gelê herêmê pir baş nêzî me dibin. Ji ber xwezaya wê em hungivê herî biqalîte yê Tirkiyeyê hildiberînin.”

DI TEBAXÊ DE HUNGIV KOM DIKIN

Keskîn diyar kir ku heya dawiya meha Tebaxê ew hungiv kom dikin û wiha got: “Heya 15’ê Îlonê em tevahiya hungiv kom dikin û meşan ji bo mehên zivistanê amede dikin.”

HEMÛ GUND MÊŞVANIYÊ DIKIN

Endezyarê Çandiniyê Ferhat Pala jî dest nîşan kir ku di demên dawî de hemû gundî bi zanebûn mêşvaniyê dikin û wiha got: “Berê mêşvanî li vê herêmê nedihat kirin. Gundiyan sewalkarî dikir. Ji bajaran bi hatina gund re, gundiyan dest bi mêşvaniyê kir.”