EDENE - Çotkarên garis, diyarkirin ku îsal berê garis kêm e û ji ber gubre û mazot buha ye heta qirikê di nav deynan de ne û bi zirarê berên xwe difiroşin.

Çotkarên Çûkûrovayê îsal ji ber berhemên wan erzan tê firotin û lêçûna wan zêde ye, di bin deynan de ne. Çotkarên îsal petêx û zebeş bi zerarê firotin niha jî garis bi zirarê difiroşin. Çotkarên got ku ew heta qirikê di nav deynan de ne û bi zirarê berê xwe difiroşin.

Cotkar Ozcan Akdag, diyar ku îsal bereketa garis kêm e û her sal lêçûnên çandiniyê zêde dibin û wiha got: "Her sal mazot, gubre, derman û tov zem dibin. Cotkar jî erdê xwe naçinînin bi îcareyê didin. Serê donimê 500-1000 lîre ye. Niha rewşa cotkar ne tu rewş e."

Akdag, anî ziman ku ji ber erdê wan ne zêde ye wan jî îcare erd girtiye û heqê îcareyê pişta wan şikandiye. Akdag wiha domand: "Li gel heqê îcare û lêçûnên erd, em ji bo yekîtiya avê jî pereyan didin. Her wiha ji bo bîçer û veguhêzkariyê jî em pereyan didin. Ji bo dolimekî em bi qasî hezar û 200 kîlo garis mesref dikin. Lê niha serê donimê 900 kîlo an jî hezar û 300 kîlo garis jê tê. Ev jî nîşan dide ku em zirarê dikin. Ne diyar e saleke din em ê biçinînin an na."

'REWŞ NE TU REWŞ E'

Akdag, dest nîşan kir ku niha garis di navbera 650-700 lîreyî de tê firotin. Akdag, diyar kir ku divê dewlet xwedî li cotkaran derkeve û piştevaniya wan bike. Akdag, da zanîn ku ji ber dewlet garis îthal dike buhayê wê dikeve û wiha got: "Yanî bi kurt û kurmancî rewşa cotkaran ne tu rewş e. Heke dewlet xwedî li cotkaran dernekeve, dê êdî cotkar nikaribin çandiniyê bikin."

Ferdi Avci jî, diyar kir ku her sal lêçûnên cotkaran zêde dibin û ji ber vê cotkar deyndar dibin. Avci, da zanîn ku ji ber germahiya zêde berdarî kêm bûye û wiha axivî: "Ez bîçervan im. Her sal çandinî kêm dike. Dema em erdê cotkarekî din çêdikin em bi zorê pereyan berhev dikin. Divê demildest dewlet çareyekê bibîne. Çimkî, kesên erd diçinînin tim zirarê dikin. Ev çar sal in buhayê garis di navbera 600-700 lîreyî de ye. Lê her sal lêçûn zêde dibin."