AMED – Çalakiya “Nobeta Wijdan û Edaletê” ya parlamenterên HDP’ê ku bi daxwaza edalet, azadî, demokrasî û wekheviyê li Amedê da destpêkirin bi biryariyek mezin di roja 3'emîn de didome. Polîsan bi derabeyên hesin koma parlamenterên HDP'ê dorpêç kirine û hemû ketin û derketina welatiyan qedexe kirine. Ji çêkirina çayê bigire heta çûyîna serdana malbatên parlamenteran rastî astengiyê tên û bariyerên polîsan park veguhertine girtîgehek servekirî.

Partiya Demokratîk a Gelan (HDP) li gel hemû êrîş û zextên faşîzmê li ber xwe dide û têkoşîna xwe ya ji bo azadkirina gelan û netewan didomîne. Demek dirêje ji hilbijêrên HDP’ê bigire heta Hevserokên Giştî yên HDP’ê bi êrîşan rû bi rû mane û tên girtin. HDP ku hedef dike li Tirkiyê û herêmê bibe sîwana bindestan û muxalîfan, lê her tim xebatên wê ji aliyê desthilatdariya AKP’ê ve tên “terorîze” kirin. Li dijî êrîşan HDP bi plansaziyek nû derket rê û li Stenbolê bi dirûşmeya "Em ranwestin, bidin rawestandin, faşîzmê rawestînin" “Deklarasyona Çareseriya Demokratîk” aşkere kiribû. Piştî vê deklarasyonê HDP’ê biryara ku li Amed, Wan, Stenbol û Îzmîrê komcivînên xwe yên Meclîsê û “Nobeta Wijdan û Edaletê" pêk bîne girt. Starta vê kampanya komcivîn û nobetê li Amedê dest pê kir.

BI HEZARAN BARIYER Û POLÎS

HDP biryar girt ku li Parka Koşuyolu ya Amedê çalakiya xwe li dar bixe. Lê Walîtiya Amedê bi hinceta “OHAL’ê” destûr neda ku çalakî li Parka Koşuyolu pêk bê û li ser vê yekê jî HDP’ê biryar da ku dê li Parka Ekîn Ceren a li navçeya Peyasa Amedê çalakiya xwe li dar bixe. Di 25’ê Tîrmehê de parlamenterên HDP’ê xwest li Parka Ekîn Ceren komcivîn û “Nobeta Wijdan û Edaletê” bi beşdariya gelê Amedê li dar bixe. Beriya komcivînê li ser fermana Waliyê Amedê cihê çalakiyê Parka Ekîn Ceren ji aliyê polîsan ve bi hezaran bariyer û maşîneyên zirxî ve hat dorpêçkirin û nehiştin ku gelê Amedê tevlî komcivîn û çalakiya parlamenteran bibe. Bi hezaran Amedî û nûnerên saziyên civaka sivîl ên Amedê xwestin biçin Parkê lê bi polîsan, maşîneyên zirxî û bariyaran hatin pêşwazîkirin û destûra wan nehat dayîn bikevin hundirê Parkê.

BARIYERÊN DUQOR Û ÇAVSORÎ

Bi hezaran polîsên li derdora parkê hatibûn bicihkirin dem bi dem êrîşî welatiyên dixwestin tevlî çalakiyê bibin kirin û bi çavsorî welatiyan ji derdorê dûr kirin. Bi taybetî di nav van dîmênên êrîşa polîsan de balkêş bû ku polîs bi gef û gurên dijwar bi ser dayik û jinan ve çûn û heqaret li welatiyan kirin. Li gel hemû gefên polîsan jî bi hezaran welatî li ber xwe dan lê ji ber ku Parka Ekîn Cerenê bi bariyeranê duqorî hat dorpêçkirin, çûyîna wan a parkê hat astengkirin. Li cihê “Nobeta Wijdan û Edaletê” tişta herî bala mirov dikişîne dayîna bariyeran a duqorî ye û bicihkirina sedan polîsî ye. Ji hemû yekîneyên Emniyeta Amedê polîs li derdora bariyaran hatine bicihkirin.

VOLTA, BARIYER Û GIRTÎGEH

Li gel hemû astentgiyan jî 10 parlamenterên HDP’ê derbasî parkê bûn û li qada parkê di nav bariyerên duqor hatine dayîn de Komcivîna Meclîsê pêk anîn û li ser komê Berdevkê HDP’ê Osman Baydemîr daxuyanî da. Baydemîr axaftina xwe bi kurdî û tirkî kir û di nav axaftina xwe de bendek sirûda Ey Reqîp jî xwend. Piştî parlamenteran komcivîna xwe bi dawî kir, dîtin ku ew bi hezaran hilbijêrên wan dixwazin bên beşdarî çalakiya wan bibin, lê polîs nahêlin. Parlamenterên HDP’ê jî bi avêtina voltayan pêkanîna polîsan û astengiyên wan şermezar kir û cihê çalakiya xwe wek “Tirkiye veguheriye girtîgehek servekirî” nirxandin. Bêyî ku parlamenter vê nirxandinê bikin lê li ber çavan jî tê xuyakirin ku cihê çalakiyê dişibe girtîgehek servekirî.

BARIYER BÛNE SÎNORÊ FAŞÎZMÊ

Di destpêkê de polîsan nehiştin ku endamên çapemeniyê jî der barê çalakiya parlamenteran de bi wan re hevpeyvînê çê bikin. Lê li dijî vê astengiya li hember çapemeniyê, nûçegihanan li derveyî parkê di nav kunên bariyaran de mîkrofon dirêjî parlamenteran kirin û wêne û dîmenên li pişt bariyeran derketin holê faşîzmê raxist ber çavan.

BARIYER Û PARLAMENTERÎ

Berdevkê HDP’ê Osman Baydemîr, Serokwekîlê Koma HDP’ê Ahmet Yildirim, parlamenterên HDP’ê Huda Kaya, Garo Paylan, Behçet Yildirim, Feleknas Uca, Nîmettullah Erdogmuş, Ziya Pîr, Muslum Dogan û Dîlan Dîrayet Taşdemîr jî di nav de HDP'iyan dest bi çalakiya “Nobeta Wijdan û Edaletê” kirin. Dem bi dem parlamenteran pişta xwe da bariyeran pirtûk xwendin û dem bi dem jî li ser pêvajoya heyî nîqaşan kirin. Dîmênên parlementeran ên li ber barîkatan ku rûniştibûn jî sosretbûna hikûmeta AKP’ê ya li dijî HDP’ê derxist holê.

DESTÛRÊ NEDAN MÎNDER Û BALÎFAN

Di roja ewil de heta saetên şevê nobet dom kir û parlamenteran xwest ji bo razanê hin eşyayên wek xalîçe, zilûk, balîf, betaniye û mînderan bînin hûndir. Lê polîsan destûr nede demek dirêj parlamenteran jî li ser vê helwesta polîsan li ber deriyê parkê çalakî rûniştinê li dar xistin. Lê li gel hemû hewldanan jî polîsan destûra balîf û mînderan nedan. Tenê destûra betaniye û zilûkan hat dayîn. Parlamenteran roja ewil ango şeva ewil a nobetê di çavdêrî û dorpêça polîsan de li nav şînahiya parkê derbas kir.

PARK DIŞIBE GIRTÎGEHEK SERVEKIRÎ

Roja duyemîn a nobetê bi beşdariya Hevseroka Giştî ya HDP’ê Serpîl Kemalbay dest pê kir. Di roja duyemîn de ji navçeyên derve bigire heta naçveyên navendî bi sedan welatî û endam û rêveberên HDP’ê xwestin bên serdana parlamenteran û piştgiriyê bidin çalakiyê lê rastî astengiya polîsan hatin. Hêjayî gotinê ye ku çûna parkê hem ji şêniyên derdorê û hem jî ji çalakvanan re qedexe ye. Ji bo çûna parkê tenê korîdorek vekirî hatiye hiştin. Polîs destûrê tenê didin rojnamegeran û şêwirmendên parlamenteran. Ji xwarin û avê bigire û heta çûyîna daşirê jî her tişt li parkê hatiye qedexekirin. Dema ku mirov dikeve parkê polîs nasnemeyan kontrol dikin û çente û amûrên rojnamegeran sero bin dikin.

ÇAYÊ DI BIN BARIYARAN DE DIGIRIN

Polîs destûr nadin ku li Parkê çay jî bê çêkirin û parlamenter ji qehwexaneyek nêz çayê dixwazin. Dema çayfiroş çayê li ser sîniyê tîne yan di bin bariyeran de an jî di bin bariyeran de dirêjî çalakvanan dike. Dema xwarin ji bo nobedaran tînin parkê polîs li poşetên xwarinê dinênirin û hûndirê xwarinê jî kontrol dikin. Gotin di cih de be xwarin jî bi hejmar tê berdan. Parlamenter li ser ser armanca çalakiya xwe û pêvajoya li Kurdistan, Tirkiyê, Rojhilata Navîn û Tirkiyê nîqaş didin meşandin û sohbetên dirêj dikin. Parlamenter her roj li parkê civînên têkildarî plansaziyê li dar dixin. Kesên xwedî nasnameyên cuda û ji siyaseta Tirkiyê û Kurdistanê siyasetmedar li parlamenteran digerin û piştgiriya xwe tînin ziman.

MALBATÊN PARLAMENTERAN JÎ BERNADIN

Malbat û zarokên parlamenteran ku dixwazin bên serdanê jî rastî astengiya polîsan tên û nahêlin ku bikevin hundirê parkê. Ji devê her parlamenterên di nobetê de ne gotin û nirxandinên hevpar derdikeve. Parlamenter wiha dibêjin: “Wê faşîzm û barbarî têk biçe û dê têkoşîna azadî, demokrasiyê û edaletê bi ser keve. Cihê çalakiya me girtîgehek servekirî ye. Niha wek em di girtîgehê de bin. Ji her kesî re heq e, ji HDP’ê re qebehet e. Ev çalakiya wîjdan û edaletê ye. Divê ku herkes xwedî lê derbikeve. Li gel hemû astengî û êrîşên nijadperest jî em ê berxwedana xwe dewam bikin.”

Bîlal Guldem - dihaber