WAN – Li gundê Dibêkî yê Qelqeliyê Vahyettîn Ozîster ji 15 saliya xwe ji teyibê li kilamên Alî Kerîm, Zahiro, Şakiro û Ayşe Şan guhdar dike û 30 sal in kilamên wan distrê.

Li gundê Dibêkî yê bi ser navçeya Qelqelî ya Wanê Vahyettîn Ozîster (46) ku şivaniyê dike 30 sal e dengbêjiyê dike. Ozîster, li Zozanên Çavhêşînê li beramberî 40 berxan şivantiya hezar 200 mihan dike. Ozîster, di şivantiya xwe de bi şev û roj destê xwe dide ber guhê xwe û bi dengê xwe yê êl û am klaman distrê.

‘MIN TEYIBÊ JI BER GUHÊ XWE NEDIKIR’

Ozîster got ku ji 15 saliya xwe ve heta niha li teyibê guhdar dike û ji Alî Kerîm, Zahiro, Şakiro û Ayşe Şan bigire gelek dengbêjan guhdar dike û ev bandoreke erênî lê kirine. Ozîster da zanîn ku ji van dengbêjan hînî dengbêjiyê bûye û wiha got: “Ez ji biçûkatiya xwe ve şivaniyê dikim. Ji 15 saliya xwe ve ez kilaman dibêjim. Ez ji mezin û hevalên xwe hînî dengbêjiyê bûm. Dema ez dihatim zozanan min teyibê ji ber guhê nedianî xwarê. Dema ez ji zozanan dihatim malê min kilaman digotin. Li zozanan guhdarkirin û gotina stranan hestek cuda ye."

'DAWETÊN BERÊ XWEŞ BÛN'

Ozîster dest nîşan kir ku ji gundên derdorê her tim ji bo dawetan ew tê vexwendin û wiha pê de çû: “Li gel stranên dengbêjiyê stranên dawetan jî dibêjim. Stranên min carina mirovan kêfxweş dikin û carna jî xemgîn dikin. Dawetên berê bêtir xweş bûn. Me stranan digot û govend dihat gerandin. Lê niha jî amûrên muzîkê derketine û hunera me jî di bin siya wan dimîne. Me stran digot û li hev vedigerand.”

'KILAM BER ÊVARKÎ XWEŞ IN'

Ozîster anî ziman ku pêwîste ev çand neye tunekirin û kilamek bi navê “Vahyettînê şivan” parve kir. Ozîster wiha dawî li gotinên xwe anî: “Dengbêjên mîna Evdalê Zeynikê, Alî Kerîm, Zahiro, Şakiro û Ayşe Şan ji bo me mînak in. Ez dixwazim li çar parçeyên Kurdistanê çanda dengbêjiyê bidome. Dema ez bi pezê xwe re bi tenê me strandina klaman pir xweş e û dema dibe berêvarkî pir ji kilaman hez dikim.”