ÎZMÎR - Koma Muzîkê ya Şemiyê (Cumartesi Muzik Grubu) ku berxwedana Dayikên Şemiyê bandor li wan kiriye ji hêla jinan ve hat avakirin. Kom li her qadên ku ji gel re vekiriye distirê û dengê muzîka polîtîk li wir olan dide. Endama komê Ozgu Ozutok diyar kir ku ew bi rêya muzîkê ji kesên hatine wêderkirin re dibin hêvî.

Di sala 2017'an de li Îzmîrê Cumartesî Muzîk Grubu ya navê xwe ji Dayikên Şemiyê digire, di pêşengiya komek jin de hat avakirin. Kom di demên dawî de li kuçe, bazar, keştî û hemû cihên ji gel re vekirî de bi riya muzîkê li dijî pergalê bertekên xwe tîne ziman. Destpêkê hejmara komê 3 kes bûn, niha ev hejmar zêde bûye. Endamê komê bi ruhekî kolektîf dixebitin û di referanduma 16'ê Nîsanê de dengê xwe bi strana "Hayir'dır Aysun" (Xêre Aysun) dan bihîsitn.

Kom niha bi stranên wekî “Cumartesî Annelerî”, (Dayikên Şemiyê) “Bay Kapîtal”, “Ozgurluk Bîzîm” (Azadî ya me ye) rêya xwe dewam dikin, herî dawî bi strana "Heykel Gozalti" (Peykerê binçavkirî) bal kişandin ser dorpêça polîsan a li Kolana Yukselê ya Enqereyê.

HEMÛ CIHÊ JI GEL RE VEKIRÎ QADA KONSERÊ YE

Endama komê Duru Oz, dest nîşan kir ku koma wan di Atolyeya Muzîkjenên Jin de cih girtine, piştre hinekî qada xwe teng kirine û kom ava kirine. Oz diyar kir ku divê jin hêj zêdetir derkevin qadan û zêdetir bi muzîkê re eleqedar bibin û aşkera kir ku hemû qadên wekî bazar, keştî, kuçe û cihên ji gel re vekirî ji bo wan qada konserê ye.

Oz da zanîn ji ber ku hin kes gelekî bi qoltixê xwe ve girêdayî ne, wan li dijî vê hezkirina qoltix, strana "Ozgurluk Bîzîm" (Azadî ya me ye) gotiye û wiha got: "Ya rast me dît ku pirsgirêk a pergal û kapîtalîzmê ye. Ji ber wê jî me strana Bay Kapîtal stira û hevekî îronî kir û rexneya xwe anî ziman. Di stranê de me gotinên wekî 'We xwe têr kir Bay kapîtal, ev têrê we nake, em ê neçin AVM'ê em ê biçin bazara şewitî' û hebikekî bi zimanekî îronî bi kar anî."

'BI AFRÎNERIYÊ EM DENGÊ XWE DERDIXIN'

Oz diyar kir ku armanca koma wan ew e tev li jiyanê bibin û wiha domand: "Em dixwazin muzîkê tev li jiyanê bikin. Gel bi erênî nêzî me dibe. Her tişt gelekî polîtîk e. Me ev hilnebjartibû. Jiyana me ji polîtîkayê ne cuda ye. Lê rêbaza anîna ziman girîng e. Birdariya Mafê Mirovan a hat binçavkirin, ya rast ji bo me hunermendan alavek e. Rewşeke ew qas tewşo mewşo ye, mirov bawer nake. Em tenê dixwazin biafirînin û dengê xwe bigihînin gel. 165 roj e 2 mirov di greva birçîbûnê de ne. Ev rewşeke gelekî absurt e."

'ME XWEST EM BIBIN DENGÊ WAN'

Endama komê Ozgu Ozutok jî got ku wê roja xwe naskiriye heta niha bi muzîkê re eleqedar e, strana xwe ya destpêkê jî ji bo kesên hatine wêderkirin çêkirine. Ozutok piştrast kir ku wan di stranê de cih daye gotinên polîtîk û ev tişt got: "Ji ber rewşa welat, me di stranên xwe de gotinên polîtîk bi kar anî. Mînak dema em dixwazin xwe di fabrîqeyekê de li ber bandê bibînin, em wê tînin ziman. Em bi vê xwe têr dikin, stranên xwe jî li gorî wê derdixin holê."

Ozutok aşkera kir ji ber ku ew jin in, wan xwestiye çîroka Dayikên Şemiyê bikin stran û wiha berdewam kir: "Rastiyeke wekî Dayikên Şemiyê li welat heye. Em bi mantalîteya ku ew roja ku wan zarokên xwe yên winda hîskirin derketin holê. Ev stran êdî bûye deynê stûyê me. Em wer difikirin ku her kes ji zarokan hez dike, lê ji zarokên xwe gelekî hez dikin. Ev jî rewşeke ku bê rexnekirin e. Gelek dayikên ku xizmên xwe windakirine hene. Ji ber wê jî divê her kes ne tenê hez ji zarokê xwe bike, hez ji hemû zarokên din bike."

Ozutok herî dawî got ku "Em bi muzîkê dixwazin hêviyê bibînin" û axaftina xwe wiha bi dawî kir: "Ne tenê jin, em dixwazin hemû mirov li kuçeyan muzîkê bikin. Em dema li kuçeyan stranan dibêjin û bi hevalên xwe re hevrû dibin, gelekî kêfxweş dibin. Bila her kes derkeve kuçeyan em li wir in."

Rûken Demîr / Gokhan Oner - dihaber