STENBOL - Nûnerên rêxistinên civaka sivîl ku di bin banê Komeleya Hawirdorê ya Mûnzûrê de hatin gel hev, ji bo komkujiya xwezayî y li Dersimê rawestînin ji Stenbolê ber bi Dersimê ve ketin rê.

Nûnerên rêxistinên civaka sivîl ku di bin banê Komeleya Hawirdorê ya Mûnzûrê de hatin gel hev, ji bo komkujiya xwezayî ya li Dersimê rawestînin ji Stenbolê ber bi Dersimê ve ketin rê. Nûner bi 2 otobêsan ketin rê û tê payîn ku dê sibê ber destê sibehê bigihêjin Dersimê.

'TÊ XWESTIN KU GEL KOÇBER BIBE'

Serokwekîlê Şaxa Komeleya Hawirdorê ya Mûnzûrê ya Stenbolê Alî Yildiz, dest nîşan kir ku ji 1938'an ve li ser Dersimê polîtîkayên taybet tên sepandin û wiha got: "Dewleta ku di sala 1938'an de mirovên me şewitandin, îro jî xwezaya me qetil dike. Dewleta ku li herêmên rojava ji bo rantê şewatê derdixîne, li erdnîgariya Mûnzûrê jî bi hewldanên bêmirovkirinê ekosîstemê qetil dike." Yildiz, astengkirina mudaxileya şewatê ya mirovan bi bîr xist û wiha got: "Bi qirkirina xwezayê dixwazin mirovan koçber bikin. Em ê rê nedin vê komkujiyê. Ji bo xwedîderketina xwezaya me em ketin rê."

‘JI BO RAWESTANDINA KOMKUJIYÊ EM KETIN RÊ'

Hevseroka Herêma 2'yemîn a Komeleyên Elewiyan ên Demokratîk (DAD) a Stenbolê Nergiz Guzel, dest nîşan kir ku ji bo ew şewata li Dersimê rawestînin ketine rê. Guzel got ku bi salan e dewlet heman polîtîkayê disepîne û wiha axivî: "Êdî em ê destûrê nedin vê polîtîkayê. Ji bo rawestandina qetilkirina xwezaya me em ketin rê."

‘DUH CIZÎR ÎRO DERSIM'

Serokê Şaxa DAD'ê ya Avcilarê Ozgur Bulan, dest nîşan kir ku şewatên li Dersimê polîtîk in û bi taybetî jî cihwarên ku i bo elewiyan pîrozwer in ji aliyê dewletê ve tên şewitandin. Bulan wiha axivî: "divê dewlet demildest dev ji van polîtîkayên xwe yên şidetê berde. Em li erdnîgariya xwe wek penaberan dijîn. Duh Cizîr, Sûr û Nisêbînê şewitandin, îro jî Dersimê. Em ê destûra vê yekê nedin û heta dawiyê li ber xwe bidin."

Piştî daxuyaniyê otobês ketin rê.