STENBOL- Kêşana belgefîlma "Suyun Olum Tarihi" (Dîroka Mirinê ya Avê) ya der barê Heskîfê de qediya. Derhênerê belgefîlmê Ali Ergul, got ku armanca wî ew e ku hafizeya dîrokî zînde bihêle.

Ji bo Bendava Ilûsûyê ku li ser Çemê Dîjleyê tê çêkirin, bi dînamîtan Heskîf tê rûxandin. Derhênerê belgefîlman Ali Ergul, ji bo li hemberî rûxandinê dîroka Heskîfê vebêje belgefîlma "Suyun Olum Tarihi" (Dîroka Mirinê ya Avê) kişand.

Ergul kişandina belgefîlmê qedandiye û got ku mebesta wî ew e ku ew heta 22'yê Îlonê Roja Heskîfê ya Cîhanê bi temamî biqedîne. Ergul, dest nîşan kir ku têkoşîna Hewldana Jîndarkirina Heskîfê ji aliyê qeyûman ve hatiye astengkirin. Ergul, diyar kir ku wî 30 rojan bi tena serê xwe belgefîlm kişandiye û di dema kişandinê de ew bi gelek zehmetiyan re rû bi rû maye. Ergul wiha axivî: "Ji ber OHAL'ê me nikaribû biçe her derî. Çûyîna herêma bendavê qedexe bû. Li her du aliyên bendavê jî qereqol hene. Hêla kelehê jî girtîbû. Ji ber me zanibû dê bê redkirin me serlêdan nekirin. Dem bi dem hin tacîz xwe dan der. Di kişandinên li Amedê de jî me bihîst ku rojnamegerekî fransî hatiye binçavkirin. Ev bûyer bi xwe jî karê me ditengijand. Hebûna OHAL'ê ji bo kişandinan zehmetî bû. Ji bo zêde em nekevin ber çavan me hewl da ku em kêşanê biqedînin."

‘ARMANC TUNEKIRINA HAFIZEYÊ YE'

Ergul, anî ziman ku çêkirina bendavê tê wateya serweriya li ser avê, lê belê armanca sereke ya bendavê ew e ku hafizeya dîrokî birûxîne. Ergul, bi bîr xist ku dê bi hezaran mirov ji warê xwe bibin û dema bendav biqede dê di jiyana xwezayî û riwekî de guherîn xwe bidin der.

Ergul, anî ziman ku wî bi aktivîstên ji bo Heskîfê têdikoşin û welatiyên wir re hevdîtin çêkirine, lê belê kes bawer nake ku dê bendav avê kom bike û wiha got: "Her çi qas têkoşîn kêm bûbe jî, mirov difikirin ku dê Heskîf di bin avê de nemîne. Bawer nakin. Ji ber vê yekê du kes bin jî her hefte tên cem hev, li hev dicivin û têkoşîn didome."

‘DIXWAZIM HÊVIYÊ BIDIM'

Ergul, anî ziman ku ew dixwaze belgefîlmê ji mihrîcanên ekolojîst re bişîne. Ergul, got ku der barê Heskîfê de gelek belgefîlm hatine çêkirin, lê belê di arşîv û mîhrîcanan de hatine rawestandin û gel wan nedîtiye. Ergul, anî ziman ku bi vê belgefîlmê wî xwestiyê ji bo têkoşînê bibe hêvî û hafizeya dîrokî ya Heskîfê zînde bihêle.