MÊRSÎN - Li Taxa Esenlî ya Akdenîza Mêrsînê, Şîrketa Anonîm a ÇÎMSA'yê hewl dide ji bo ocaxa keviran rêyekê çêbike, lê niştecihên taxê ji vê rewşê nerazîne. Şêniyên Esenliyê dest nîşan kirin ku ji ber ocaxa keviran zevî û bîrên wan ên avê tune dibin.
Li Taxa Esenlî ya Akdenîza Mêrsînê, Şîrketa Anonîm a ÇÎMSA'yê hewl dide ji bo ocaxa keviran riyeke nû ya yek kîlometreyî çêbike. Lê belê tê gotin ku çêkirina vê riyê tê wateya tunekirina zevî û bîrên avê yên li herêmê. Walîtiyê bêyî ku texrîbatên dê xwe bidin der esas bigire ji bo çêkirina rê ruhset daye, lê belê gelê herêmê li hemberî vê rewşê ne.
'DARÊN ME YÊN ZEYTÛNAN BI TUNEBÛYÎNÊ RE RÛ BI RÛ NE'
Keyayê Taxa Esenliyê Hasan Tan, diyar kir ku taxa wan û derdora wê bi piranî zeviyên çandiniyê ne û wan 10 meh berê rapora ku taxa wan taxa zeviyên çandiniyê ye wergirtiye û wiha got: "Çêkirina rê û ocaxa keviran li dijî qanûnê ye." Tan, diyar kir ku li zeviyên derdora taxê darên zeytûnan hene. Tan da zanîn ku di qanûna Jimare 5373'yan de hatiye diyarkirin ku çêkirina ocaxên kevirî dê zirarê bide darên zeytûnan. Tan anî ziman ku niştecihên taxê ocaxa keviran naxwazin û ji bo ocax neyê çêkirin wan daxwazname dane hemû sazî û dezgehên eleqedar. Tan, dest nîşan kir ku teqemeniyên ku di dema çêkirina ocaxê de bên bikaranîn, dê bandoreke neyînî li ser çavkaniyên avê bike û wiha axivî: "Ji ber rîska windakirina avê heye, em naxwazin ocaxa keviran bê çêkirin."
‘TEKANE ÇAVKANIYA DEBARA ME ÇANDINÎ YE'
Tan, dest nîşan kir ku ji bo riya ku diçe ocaxa keviran destûr ji Gerînendetiya Daristanan hatiye stendin, lê belê ew bi her awayî li dijî ocaxa keviran in û ew naxwazin zeviyên wan ên çandiniyê bên tunekirin. Tan wiha axivî: "Li vir nêzî hezar kes bi çandiniyê re eleqedar dibe. Çavkaniya debarê ya taxê ev zeviyên çandiniyê ne. Tekane daxwaza me ew e ku bila dest nedin zeviyên me. Bila vê ocaxê li ser erdên ku ji bo çandiniyê ne guncav in çêbikin. Em ne li dijî vê yekê ne."
'JI BER TEQÎNAN DERZ LI MALAN KETIN'
Niştecihê taxê Necdet Erol jî, dest nîşan kir ku ji ber teqemeniyên ku di dema çêkirina ocaxê de hatin bikaranîn gelek mal hejiyane û derizîne. Erol, diyar kir ku divê rayedar aşkere bikin ku ka destûra van teqînan heye yan na. Erol got ku ew ji bo van teqînan gelek caran çûne cem cendirmeyan, lê belê tu tişt nehatiye kirin. Erol dest nîşan kir ku wan li dijî van teqînan çalakî li dar xistine û piştî çalakiyan 3 rojan teqîn çênebûne, lê belê piştî sê rojan dubare destpêkirine. Erol, diyar kir ku ji bo van teqînan tenê destûr ji Gerînendetiya Daristanan hatiye stendin lê belê bi tu awayî guh nedane fikrê gel.
'EM LI DIJÎ OCAXA KEVIRAN E'
Şêniyê taxê Şerafettin Çeliko jî, anî ziman ku ji bo çêkirina rê berpirsiyarî dikeve ser milê Gerînendetiya Daristanan, lê belê bêyî ku gerînendetî destûrê ji gel bixwaze destûra tiştekî wisa daye û wiha got: "Gerînendetiya Daristanan nehat û tiştek ji gel re negot. Guh neda fikra gel. Heke Gerînendetiya Daristanan saziyek be, taliya talî em jî wek cotkarên ku di vê gerînendetiyê dixebitin jî saziyek in. Ji ber vê di dema destûra çêkirina vê ocaxê de diviya ji bo destûrê serî li me jî bidanan."
Çeliko, anî ziman ku ava gelek bîrên avê yên bi ruhset şolî bûye û ew li hemberî vê yekê ne ku ocaxên keviran li nav zeviyên çandiniyê bên çêkirin. Çelîko wiha got: "Di vî warî de heke em û cendirmeyan rûberî hev bibin jî em ê doza mafê xwe bikin."