MÊRDÎN – Li Mêrsînê rayedarên AKP’ê perava li Parka Tabîatan a 100. Yil ji betonkirinê re vekirin. Ev yek dê jiyana reqên behrê Caretta Carettayan bi tunebûnê re rû bi rû bihêlin.

Parka 100. Yil a Tabîatan a li navçeya Mezîtlî ya Mêrsînê cihê reqên behrê ne. Li Parkê Chelona Mydas û Carretta Caretta du cure reqên behrê tên xwedîkirin û nifşên van sewalan ber bi tunebûnê ve diçe. Ji ber ku cihê xwedîkirina reqan ji aliyê rayedaran ve derxistin îhaleyê û perav tê betonkirin cihê reqan jî zerar dît. Ji ber qada jiyankirina reqan tê tunekirin û peravên deryayê tên îstîmlaqkirin şêniyên taxa 75. Yil bertek nîşan dan.

‘PERAV NEFES DIDE ME’

Keyayê taxê Yakup Aytekîn bertek nîşanî îstîmlaqkirina qadê û perava deryayê ku veguherindine cihê rantê da û got ku ew li dijî îstîmlaqkirina qadê ne û divê qad di bin kontrola şaredariyê de be. Aytekîn da zanîn ku gelê taxê li dijî îstîmlaqkirinê ye û ji ber îstîmlaqkirina qadê welatî nikarin biçin peravê û pirsgirêkan dijîn. Aytekîn destnîşan kir ku peravê deryayê nefes dide wan û dema ev perav bên girtin dê nefesa wan bê birîn.

'EM ÎSTÎMLAQKIRINÊ NAXWAZIN’

Aytekîn anî ziman ku şêniyên taxê xetereya betonkirina peravê difikirin û bi îstîmlaqkirin û betonkirinê re dê jiyana sewal jî tune bibe. Aytekîn da zanîn ku bi taybetî dê Caretta Carettayan bi tunebûnê re rû bi rû bimînin û got: “Em îstîmlaqkirinê naxwazin.”

'BILA PERAV BÊ PARASTIN’

Şêniya taxê Ayşe Bagci jî destnîşan kir ku welatiyên li peravê dijîn hemû malbatên aboriya wan nebaş û kesên teqewît bûne û ew li dijî îstîmlaqkirin û vebûna cihê rantê ne û ew dixwazin ku perava wan bê parastin.

Ebru Selen jî anî ziman ku Perava 100. Yil cihê qada jiyankirina Caretta Carettayan e û dema perav bê îstîmlaqkirin dê Caretta Carettayan bi tunebûnê re rû bi rû bimînin û ji ber vê yekê jî ew dixwazin ku perav bê parastin.