WAN – Yekemîn rûniştina doza Zekî Torun ê ji qetilkirina hevjîna xwe Aslihan Ertaş tê darizandin hat dîtin. Di daneşînê de 2 keçên Torun ên şahidiya bûyerê kirin, îfadeyên xwe guhertin.

Li taxa Kavurgali ya navçeya Elbaka Wanê Aslihan Ertaş (37) ji aliyê hevjînê xwe yê mehra mele Zekî Torun (48) ve di 13’ê çileya 2017’an de hatibû qetilkirin. Yekemîn rûniştina doza Torun ê ku ji qetilkirina hevjîna xwe tê darizandin hat dîtin. Daneşîn li 1’emîn Dadgeha Cezayê Giran a Wanê hat dîtin. Di rûniştinê de bersûc Torun, parêzerên malbata Ertaş, Mujde Tozbey Erden û Meltem Şahîn amade bûn.

Piştî tespîta nasnameyan bersûc parastina xwe kir û îfadeyên dane dozgeriyê dubare kir. Torun îdia kir ku hevjîna wî Aslihan Ertaş ji ser banê malê ve ketiye ser tenûrê û jiyana xwe ji dest daye.

Pişt re keçên Torun, Derya Torun (19) û Rûkiye Torun (19) hatin guhdarkirin. Her du xwişkan di îfadeyên dabûn dozgeriyê de diyar kiribûn ku jinbava wan rastî tundiya bavê wan hatiye. Keçên Torun di rûniştin de axivîn û angaşt kirin ku bavê wan tundiyê li ser jinbava wan nekiriye û îfadeyên xwe guherandin.

Heyeta dadgehê biryara da ku dê di rûniştina bê de ajokarê ambulansê û keyayê gund bên guhdarkirin û dozê taloqî dîrokek pêş wext kir.