WAN – Li Girtîgeha Tîpa T a Wanê girtiyên sîrgûnî Girtîgeha Sergirtî ya Seydîşehîr a Konyayê kirin, tazî ji cîhaza x-ray re derbas kirin û xwestin “Tekbîrê” bidin.

Li Girtîgeha Tîpa T a Wanê, 9 girtiyên siyasî bêyî ku agahiyê bidin malbatên wan sîrgûnê Girtîgeha Sergirtî ya Seydîşehîr a Konyayê hatin kirin. Yilmaz Uçar ê di nava girtîyên di 18’ê Tebaxê de hatin sirgûnkirin de bû, îro li malbata xwe geriya û agahî da. Uçar diyar kir ku li girtîgeha Seydîşehîr rastî pêkanînên xirab hatin.

DIXWAZIN GIRTIYAN WINDA BIKIN

Uçar bi rêya malbata xwe da zanîn ku dema ew gihiştin Seydîşehîrê bi awayekê tazî di cîhazê x-ray re derbas kirine û wiha got: “Ji roja înê û vir ve karê paqijiyê bi me didin kirin. Berî jimartinê gardiyan dixwazin em ‘Tekbîr’ bidin. Ji ber ku em girtiyên siyasine muameleya xirab li me dikin. Ji roja înê heya niha, tenê nanê zûha sê rojin didin me. Em her roj zilmê dibînin. Dê me wisan winda bikin ku êdî hûn me nebinin. Me li Wanê têkildarî mijarê daxwazname dan û li vir jî em ê bidin. Lê kes eleqdar nabe.”

Malbatê diyar kir ku têkildarî sîrgûna Uçar a Seydîşehîr, tu agahî ji wan re nehatiye dayîn.