NAVENDA NÛÇEYAN - Tevî ku rewşa wî ya tenduristiyê ne baş e û temenê wî mezin e, ji bo tola kurê xwe bigire, tev li şervanên QSD'ê bû.

Zilma DAIŞ'ê ya li bajarên Sûriyeyê pêk aniye, tu nirx û exlaqê mirovahiyê qebûl nake. Di kiryarên DAIŞ'ê de neyartiya li dijî mirovahiyê, tunekirina çandê, serjêkirin, gulebaran û her cure rêbazên li dijî exlaqê civakê serdest e. Kesên ku êşa hovîtiya wan nekişandiye nemaye. Bi hatina hêzên neteweya demokratîk QSD'ê re, êdî her kes tev li dibe û tola xwe ji DAIŞ'ê distîne. Ji wan welatiyan yek jî apê Hisên Esed (54) e. Tevî ku nexweşiya wî ya dil heye jî li eniya rojavayê bajarê Reqqayê di çeperên pêş de cih digire. Di destekî wî de çek, di destê din jî dermanê xwe digerîne û li dijî DAIŞ'ê şer dike. Apê Hisên destnîşan kir ku kurê wî li ber çavê wî qetil kirine, ew ji bo tola kurê xwe û biraziyê xwe bigire, tev li QSD'ê bûye û li dijî DAIŞ'ê şer dike.

KURÊ WÎ LI BER ÇAVÊN WÎ QETIL KIRIN

Li gorî nûçeya ANHA'yê apê Hisên yek jî welatiyên taxa Deriyê ya bajarê Reqqayê ye, keçek û du kurên wî hene. Malbata wî gelek zilm ji destê DAIŞ'ê dîtiye. DAIŞ'ê bi hincetên vala kurê wî yê bi navê Hanî (25) li ber çavên wî gulebaran kirine. Apê Hisên ji vê yekê gelekî xemgîn dibe û dema ku malbata xwe digihîne herêmên rizgarkirî, ji bo tolhildana kurê xwe beşdarî QSD'ê dibe.

'GOTIN KESEKÎ DIKUJIN...'

Apê Hisên der barê qetilkirina kurê xwe de jî axivî û ev tişt got: "Haya min ji tiştekî tune bû, dema ku ez diçûm sûkê pêdiviyên malê werbigirim, min bihîst ku dê çete welatiyekî bi tawana kufrê bikujin. Hevalekî min agahî da min û got ku ew welatî kurê min Hanî ye. Min bi lez berê xwe da cihê bûyerê, dema ez gihîştim wir, çeteyan li ber çavên min Hanî gulebaran kirin û kuştin."

Apê Hisên bi dilekî şewitî û çavên tijî hêsir got ku ew dixwaze tola kurê xwe hilîne û wiha domand: "Ez ranawestim heta ku bajarê me bi tevahî ji çeteyan bê rizgarkirin, em ê têbikoşin. Ev bi axaftinê nikarim zilma çeteyan vebêjim. Serjêkirina mirovan li gel wan tiştekî pir hêsan e. Çeteyan welatiyên belengaz bi hincetên bê bingeh sûcdr dikirin û davêtin girtîgehê. Kiryarên çeteyan dûrî ola îslamê ne."

Apê Hisên diyar kir ku ew ê bajarê xwe rizgar bikin û DAIŞ'ê tune bikin.

Apê Hisên di dawiya axaftina xwe de bang li hemû welatiyên herêmê kirin ku beşdarî nava refên QSD'ê bibin û bajarê xwe rizgar bikin.