AMED - Hevserokê Şaxa BES'a Amedê Bedirhan Çetinkaya yê ji ber beşdarbûyîna meş û daxuyaniyên çapemeniyê yên di çarçoveya fealiyetên sendîkayî de bi daxwaza 20 sal cezayê girtîgehê dihat darizandin, hat tahliyekirin.
Hevserokê Şaxa Sendîkaya Kedkarên Buroyê (BES) a Amedê Bedirhan Çetinkaya ê di 3'yê Cotmeha 2016'an de hatibû girtin, rûniştina yekemîn a doza ku bi daxawza 20 sal cezayê girtîgehê lê hatibû vekirin hat dîtin. Çetinkaya yê bi KHK'ê hatibû îxarckirin, ji ber li dijî şîrketa petrolê ya li gund xaka wan dagirkiribû rawestiya bû, bi "kolandina xendekê" tê tawanbarkirin. Di rûniştina li 8'emîn Dadgeha Cezayê Giran a Amedê, li gel Çetinkaya û parêzerên wî, Serokê Giştî yê KESK'ê Lami Ozgen, Endamê MYK'yê yê BES'ê Davut Balikçi, endamên Platforma Şaxên KESK'ê yên Amedê û malbata Çetinkaya amade bûn. Piştî xwendina îdianameyê rûniştin dest pê kir û Çetinkaya bi kurdî parêziya xwe kir.
Çatinkaya di parêziya xwe de diyar kir ku, ew Hevserokê Şaxa BES'a Amedê ye, di meş û daxuyaniyên ku di çarçoveya fealiyetên sendîkayî de beşdarî wan bûye her parêziya aştî û biratiyê kiriye û got, ji bo gelên kurd û tirk bi hev re wek xwişk û bira bijîn ew her têkoşiyaye. Çetinkaya ji bo beşadrbûyîna xwe ya "Konferansa Ji Bo Aştiyê" ya li Amedê hat lidarxistin wiha got: "Kî devê xwe veke û bibêje aşti, ji aliyê dewletê ve wek 'terorîst' tê îlankirin." Çetinkaya, diyar kir ku di dema qedexeya derketina derve û pevçûnên li Sûrê ji bo mirov nemirin, avahiyên dîrokî neyên rûxandin ew beşdarî daxuyaniya çapemeniyê û meşê bûye û wiha got: "Me bi çavên xwe dîti ku tangan Sûrê bombebaran kir." Çetinkaya ji bo xendekên li gund kolan jî diyar kir ku, wan li dijî şîrketa petrolê ya xaka wan dagirkiriye ew vekiribûn.
Piştî parêziyê heyeta dadgehê navber da rûniştin. Piştî navberê heyetê biryara xwe diyar kir. Dadgeha ku biryara tahliyeya Çetinkaya da, dozê taloqî Hezîranê kir.