COLEMÊRG- Li Colemêrga ku gelek deverên wê hatine qedexekirin, niha welatî dawiya heftê berê xwe didin Sûlava Horê ku yek ji wan cihên neqedexekirî ye.

Li Colemêrga ku bi hinceta "ewlehiyê" bi dehan zozan û herêm hatine qedexekirin, welatî dawiya hefteyê berê xwe didin qadên ku nehatine qedexekirin. Ji wan qadan yek jê jî Sûlava Horê ye. Sûlav, 15 kîlometreyan dûrî bajêr e û li ser riya Colemêrg-Şirnexê ye. Mezin li Sûlava Horê bêhna xwe vedidin, zarok jî dikevin ava wê û xwe hênik dikin.

‘DI DEST ME DE TENÊ HORÊ MA'

Yek ji kesên ku tevî malbata xwe hatiye sûlavê Mikail Timur e. Timur, anî ziman ku li bajêr gelek qadên xweşik hene, lê belê gelek jê hatine qedexekirin. Timur wiha got: "Nava heftê em dixebitin. Dawiya heftê jî gelek qadên xweşik hene ku mirov biçê, lê belê ji ber ku bi hinceta 'ewlehiyê' hatine qedexekirin em nikarin biçin wan. Berê gelek qadên wek Robarê Talê, Robarê Kehê, herêma Dêzê û hwd. hebûn ku em biçinê. Em diçûn wan deran û me bêhna xwe derdixist. Êdî em nikarin biçin wan deran. Niha di dest me de tenê ev der maye. Em jî tevî zarokên xwe hatine vir û hewl didin ku wê stresa bajêr ji ser xwe bavêjin."

‘DIVÊ MIROV BÊTIR HAY JI PAQIJIYA DERDORÊ HEBIN'

Ji welatiyan Hamdullah Guler wiha axivî: “Ji bo zarok bêhnê bistînin em hatin vir. Lê belê heke hinekî li van deran bê nihêrtin, dê xweşiktir bibe." Ubeydullah Gur jî balê kişand ser qirêjiya hawirdorê û wiha got: "Ev der perçeyeke bihuştê ne, lê belê kesên ku berê hatine guh nedane paqijiya hawirdorê. Bang li rayedaran dikim. Divê paqijiya van deran bê kirin. Dibe ku fêdeya wê ji bo turîzmê hebe."

ÇIMA KES TIŞTEKÎ NAKE?

Dilan Bayhan jî balê kişand ser qedexeya li herêmê û wiha got: "Ev der herêmek zaf xweşik e û weke vir gelek herêmên me yên ku mirov bêhna xwe lê vedin hene. Lê belê hemû wek herêma qedexe hatine îlankirin. Çima kes tiştekî nake? Ev nebihîstiyarî me colemêrgiyan xemgîn dike. Dengê me zêde nayê ragihandin."