WAN - Piştî erdheja Wanê, TOKÎ'yê li gundê Yûkari Bakraçê avahî çêkirin, lê belê ji bo van avahiyan ne av û ne jî rê hat çêkirin. Ji ber vê gundî van pêdiviyên xwe li gundê ku kîlometre û nîvekê dûrî wan e peyda dikin. Gundiyan wiha got: "Em qediyan lê pirsgirêk neqediyan."

Piştî erdheja Wanê ya sala 2011'an, TOKÎ'yê li gundê Yûkarê Bakraçê avahî çêkirin. Lê belê ji bo van avahiyan xizmeta av û rê peyda nekir. Gundî ji bo van pêdiviyên xwe bi cih bînin, diçin gundê Aşagi Bakraçê ku kîlometre û nîvekê dûr wan e.

Nişteciha gund Muhteber Başlak (38), anî ziman ku dema di erdheja Wanê de mala wê rûxiyaye, ew derbasî avahiyên TOKÎ yên li gundê Yûkari Bakraçê bûne. Başlak, kêmasiyên av, rê û dibistanê yên gund vegotin û anî ziman ku, bi taybetî jî ew zivistanê perîşan dibin. Başlak, ragihand ku ji ber ku wesayît tune ye ew her roj bi saetan dimeşin û wiha bertek nîşan da: "Dewletê piştî erdhejê avahî çêkirin, lê rê çênekir. Em her roj tevî zarokên xwe rezîl dibin. Ma wisa rihet e ku mirov her roj ewqas rê biçe û bê? Lê tenê di dema hilbijartinê de em tên bîra mirovan."

'KEYAYÊ GUND PIRSGIRÊKÊ ÇARESER NAKE'

Hamî Karal (80) 30 sal in li gundê Yûkarê Bakraçê rûdinê û derpêş kir ku, pirsgirêk di keyayê gund de ye û wiha got: "Keyayê gund guh nade pirsgirêkên me û pirsgirêkên me nayîne ziman." Karal, diyar kir ku ew ji bo avê heywanên xwe dibe gundê Aşagi Bakraçê û wiha domand: "Êdî zarokên min bi heywanan re bilî dibin. Êdî ez nikarim ewqas rê biçim û bêm. Wisa difikirim ku dê kes vê pirsgirêkê çareser neke. Bi salan e em dikişînin, lê kes sozê xwe bi cih nayîne."

Karal, anî ziman ku ji ber bêavîtiyê ew nikarin baxçeyên xwe av bidin û wiha axivî: "Erdên me tim bêav dimînin. Berê me çandiniya xwe dikir, lê niha em nikarin bikin. Badilhewa av ji çiyê diherike. Qenalên ku çêkiribûn peremperçe bûne, lê nayên çênakin. Yanî pirsgirêkên vî gundî naqedin. Em qediyan, lê pirsgirêk neqediyan."