WAN- Krîza aborî û rewşa şer pişta esnafên bazarê jî şikand. Esnafên ku ji firotinan ne kêfxweş in, xwestin ku demildest aştî çêbibe. Bazarvanan, anî ziman ku kesên rewşa aboriya wan nebaş e tên bazaran, lê dema pere tune be xizan jî nikarin bên.

Krîza aborî û pêvajoya pevçûnî, pişta esnafên bazarê jî şikand. Esnafên bazara ku roja şemiyê li Taxa Terzîoglû ya Wanê tê vekirin, gotin ku karê wan kesad e.

Mahmût Sezgîn (62), anî ziman ku diviya ji ber meha Remezanê karê wan baş bibûna, lê belê ew xweziya xwe bi salên berê tînin. Sezgîn wiha got: "Êdî Remezanên berê tune ne, karê me jî ne wek berê ye. Heke şer tune be, dê her kes kêfxweş bibe. Lê îsal şer heye. Kes ji vê rewşê ne razî ye. Ji ber şer pere bi mirovan re tune ye û ev jî bandorê li bazarê dike. Em naxwazin kes bimire."

'HÛN BAZARÊ DIBÎNIN, PERE BI KESÎ RE TUNE YE'

Esnaf Ferhat Polat (50), got ku îsal rewşa karê wan qet nebaş e û wiha axivî: "Sala çûyîn karê me baş bû. Welat xizan bûye, pere bi kesî re nema. Bandora şerê li herêmê jî li ser vê rewşê heye. Ji ber vê pere bi mirovan re tune ye. Hûn bazarê dibînin, kes tune çimkî pere tune."

Ziya Aladag (40), ku 15 sal in li bazaran esnaftiyê dike jî wiha got: "Me digot belkî di Remezanê de rewşa karê me baş bibe. Lê hûn dibînin kar tune ye. Ji ber derî girtîne, kes ji derve nayê. Li Tirkiyeyê jî tişt buha ne. Mirovên xizan tên bazarê. Lê bi wan re jî pere tune ye."

‘REMEZANA SALA ÇÛYÎN KARÊ ME BAŞ BÛ'

Nasir Atabey (44) jî wiha got: "Ez tiştên bişekir, loqim difiroşim. Lê îsal qet karê me tune ye. Ji ber şerê îsal qet kar tune ye. Sala çûyîn di Remezanê de ev der tije bû. Lê hûn dibînin kes tune ye, sedema vê jî şer e. Tenê daxwaza me aştî ye. Ji bo her tişt baş bibe, em dibêjin aştî."

Birayên Seyîthan, Bîlal û Zekeriya yên ku lûfik û xewliyan difiorşin jî anîn ziman ku ew bi zorê malzemeyên ku diya wan çêkirine difiroşin.