ENQERE - Berdevka Meclîsa Jinan a HDP'ê Dilan Dirayet Taşdemir diyar kir ku ji bo rawestandin û teşhîrkirina taciz, tecawiz, îstismarkirina zarokan û polîtîkayên ku li ser bedena jinê tên birêvebirin kampanya da destpêkirin û dê çalakiyên wan heta 25'ê Mijdarê bidomin.

Meclîsa Jinan a HDP'ê, mehên borî civînek li dar xistibû û di wê civînê de biryara "Bernameya têkoşîna li dijî şidetê" dabû. Berdevka Meclîsa Jinan a HDP'ê Dilan Dirayet Taşdemir der barê kampanyayê de axivî û wiha got: "Ji bo rawestandin û teşhîrkirina taciz, tecawiz, îstismarkirina zarokan û polîtîkayên ku li ser bedena jinê tên birêvebirin me ev kampanya da destpêkirin." Taşdemir, da zanîn ku dê ev çalakî heta 25'ê Mijdarê Roja Têkoşîna li Hemberî Şideta li Dijî Jinê û Piştevaniya Navnetewî bidomin.

Taşdemir, diyar kir ku ew xwediyê wê hêze ne ku dikarin polîtîkayên ku li hemberî destkeftiyên jinan tên meşandin rawestînin û ew ê di serdema nû de kampanyayeke çalak û nû bi rê ve bibin. Taşdemir wiha got: "Dê ya vê carê hîn xwemaltir be û hîn bêtir balê bikêşe ser pirsgirêkên jinan, pirsgirêkên civakiyî. Dê dirûşmeyeke vê kampanyaya me hebe û dê di çarçoveya vê dirûşmeyê de çalakî bên lidarxistin."

TÊKOŞÎNA LI DIJÎ TACIZ, TECAWIZ Û QEYÛMAN

Taşdemir, dest nîşan kir ku di her serdemê de li dijî destkeftiyên jinan ên bi bedêlên giran bi dest xistine hene û di her demê de li hemberî van êrîşan divitiya têkoşînê li jinan peyda dibe. Taşdemir, diyar kir ku wan di vê çarçoveyê de biryara "Bernameya têkoşîna li dijî şidetê" daye û wiha got: "Jin ji ber terhên xwe yên jiyanê, li kuçeyan, parkan bi şidetê re rû bi rû dimînin. Keda jinê tê desteserkirin. Bi riya qeyûman destkeftiyên jinan tên xespkirin. Her wiha jinên berxwedêr, jinên li ser navê jinan xwedî gotin in û pêşeng in tên girtin. Di girtîgehan de li dijî jinan êrîşên di asta îşkenceyê de hene."

Taşdemir bi bîr xist ku di şeran de, di serîhildanên civakiyî de jin tim bi nêzîkatiyên nêrzayî yên eciqandin, xespkirin û xenîmetiyî re rû bir û dimînin, lê belê ev yek li Rojavayê bi pêşengiya jinan hatiye şikandin. Taşdemir wiha domand: "Bi taybetî jî îro li Rojhilata Navîn, li Kurdistanê û li Tirkiyeyê herî zêde jin li hemberî van polîtîkayên faşîzan xwedî hêz in. Mînak, dema mirov li Şoreşa Rojavayê dinihêre herî zêde jin pêşengtiyê dikin û her wiha jin peymana civakiyî li ser asasê wekheviyê ava dikin û ev yek ne tenê ji bo azadiya jinê ji bo guherîn û veguherîna hemû civakê tê kirin û ji bo vê yekê têdikoşin."