MÊRSÎN - Parêzer Nesrîn Gozen Bîlek diyar kir ku axaftinên desthilatdariyê hişmendiya mêr a ser dest sor dike û ev bi xwe re êrîşên zayendî û şidetê zêde dike. Bîlek aşkera kir ku ji bo pêşî li şidetê bê giritn, divê piştgirî û hêzeke jinê ya rêxistinkirî bê avakirin.

Di her qadê de êrîşên zanendî li dijî jinê dewam dikin, nîqaşên di vê der barê de her roj di rojevê de ne. Polîtîkaya dewletê ya ku jinê tune dihesibîne, her roj vê şidetê zêde dike. Parêzer Nesrî Gozen Bîlek da zanîn ku gotinên desthilatdariyê hişmendiya mêr a serdest sor dike, bi vê re şidet û êrîşên zayendî li dijî jinan zêde dibin. Bîlek got ku ji ber van axaftinan, di nêzikatiya li dijî jinê de tu guhertin çênebûye.

Bîlek aşkera kir ku kuştinên jinan ne tekakesî ne pirsgirêkeke civakî ye û wiha axivî: "Ji bo êrîşên li dijî jinan rawestin, divê piştgiriyeke civakî bê avakirin. Heta ev piştgirî û hêz nebe, ne pêkan e ku êrîşên li dijî jinan rawestin. Sedema van êrîşên li dijî jinan, polîtîkaya dewletê ya bi salan e. Ji bo çareseriyeke mayînde, divê dengekî bi hêz hebe."

'DESTHILATDARÎ DI ÊRÎŞÊ DE YE'

Bîlek destnîşan kir ku jinên ku rastî êrîşê tên, divê cihekî wanê bi ewle hebe û wiha pê de çû: "Divê baş bê zanîn ku desthilatdarî ne di hewldana parastinê, di nava êrîşê de ye." Bîlek da zanîn ku di salên dawî de hikumetê ji bo jinan hin qanûnên parastinê derxistine û tenê bi nêrîneke polîtîk a berjewendiyan li vê qanûnê mêze dikin û piştrast kir ku divê li dijî şidetê têkoşîneke hêj mezintir û bihêztir bê dayîn.

Bîlek anî ziman ku di dozên êrîşên zayendî de her dem nêzikatiyeke "Tiştekê ku heq kiriye heye" xwe dide der, ji bo di van dozan de tiştek bê bidestxistin, divê nêrîna serdest û hişmendiya wê bê şikandin. Bîlek got ku "Divê parêzer bi rêxistinkirî nêzîk bibin" û axaftina xwe wiha bi dawî kir: "Ji bo ev hişmendiya serdest a di darazê de bê şikandin, peywireke girîng dikeve ser milê parêzerên jin. Divê parêzer bi awayekî cidê xwe rêxistin bikin."