AMED – Wezîr û rêveberên AKP’ê yên ku her cara tên Sûrê piştî wêneyên xwe dikişînin, bêyî ku li pirsgirêkên esnafan guhdar bikin dizivirin diçin. Lê hayê rayedarên AKP’ê ji girtina derabeyên esnafan tune ye. Esnaf diyar dikin ku bi van ziyaretan tu pirsgirêk nayê çareserkirin û tiştekî naguherîne.

Bi krîza aboriyê re li navçeya Sûrê ya Amedê ku hat xerakirin û tê xerakirin esnaf îflas dikin û yek bi yek derabeyên kargehan digirin. Demên beriya pêvajoya şer ku li Kolana Gazî ya Sûrê te xwelî biavêta nediket xwarê ji mirovan lê îro bêdeng e. Her çiqas Çarşiya Şewitî ya Sûrê ji nû ve bê restorekirin jî lê rûyê esnafan nakene û ji serê sibê heta êvarê li benda mişteriyanin. Balkêşe ku li Çarşiya Şewitî dikanên tên restorekirin bi “yektîpê û yekrengî” tên çêkirin. Her çiqas her cara ku wezîr û rayedarên AKP’ê bên Sûrê daxuyaniyan bidin û ziyaret bikin jî lê pirsgirêkên esnafan çareser nakin. Wezîr û rayedar tenê tên wêneyên xwe dikişînin û bêyî ku li derd û pirsgirêkên esnafan guhdar bikin dizivirin. Esnafên Sûrê jî wiha gotin: “Em bawer nakin ku ziyaretên wan li pêşiya girtina derabeyên me bibe asteng.”

‘EM Ê WÊ BAŞIYÊ BIBÎNIN GELO?’

Erdan Ceylan ê ku 15 sale li Çarşiya Şewitî esnafiyê dike diyar kir ku ji roja li Çarşiya Şewitî restorasyonê dest pê kiriye şûn ve karê wan ne başe û wiha got: “Her roj em dibêjin gelo wê sibê çawa be. Restorasyona wan hêj dewam dike. Toz û molozên restorasyonê zerarek mezin dide me. Mişterî ditirse ku fiyeta tiştekî bipirse.” Ceylan destnîşan kir ku Çarşiya Şewitî mîna berê ne qelebalixe û wiha domand: “Her tim dibêjin ku dê piştî restorasyonê baş bibe. Lê heta wê dema ku dibêjin dê baş bibe ez bimînim gelo? Ez jî nizanim. Em bi girtina derabeyan re rû bi rû mane.”

‘QEDEXE Û XERAKIRIN BANDOR DIKE’

Ceylan da zanîn ku di 2 salên dawî de li sûkê tu turîstek nedîtiye û pêvajoya şer û xerakirina Sûrê bandorek neyînî li ser esnafên Sûrê dike. Ceylan got ku her deverê Sûrê dîroke û wiha lê zêde kir: “Mirovan ji bo nava Sûrê bibîne ji welatan û şaristanan dihatin vir. Lê niha çûyîna gelek taxên Sûrê û kelehan qedexe ye. Dê çima însan bên vir.”

DIKANA 50 SALÎ DIGIRIN

Emîrhan Akcan ê ku dikana wî ya pêlavan heye û berdewamiya karê bavê xwe dike balkêşe ku li ber dikana xwe nivîsa “Em digirin” daliqandiye. Akcan ê ku 50 sale li Çarşiya Şewitî esnafiyê dikin ji ber ku mişterî tune ne bi gazincin. Akcan bal kişand ser koçberiya li Sûrê û got ku ji bo mirov dîsa vegerin Sûrê pêdivî bi demê heye.

‘ZIYARETA WAN TIŞTEK NAGUHERÎ NE’

Akcan da zanîn ku di salek dawî de ne turîstên biyanî ne jî turîstên herêmê kes nayê Çarşiya Şewitî û wiha axivî: “Vê xebata restorasyonê jî ku dikin tene ji bo baş bê dîtin dikin. Tu feydeya vê restorasyonê tune ye. Esnaf zerara herî mezin dike. Em neçarin kargehê bigirin.” Akcan têkildarî ziyareta wezîr û rayedarên AKP’ê ya Sûrê jî wiha got: “Ez dibinim nabînim tên Sûrê ziyaret dikin. Lê heta niha tu başiyek wan li me nebûye. Feydeya wan çênebûye û dê çênebe jî. Ez ne bawerim ku wê ziyareta wan tiştekî biguherîne.”

‘BÊN ZIYARET BIKIN WÊ ÇI BIBE’

Abdullah Er ê esnaf jî jî destnîşan kir ku ji ber pêvajoya şer mirov ditirsin bên Sûrê û got: “Sûr cihekî bi ewle ye. Lê mixabin kes nayê. Mirov dikare her tiştî li Sûrê bibîne. Em dixwazin hemû gelê me bê vir dan û sitendina xwe bike. Ziyareta rayedaran jî vala ye. Tu feyda wan li me nabe. Wezîr were dê çi bibe neyê dê çi bibe. Esnaf di nav rewşek şerpeze de ne. Ji bo em dikana xwe negirin li ber xwe didin.”

‘RESTORASYON ZIRARÊ DIDE ME’

Er diyar kir ku razemeniya hikumet ji bo rojavayê Tirkiyê dike ji bo bajarên heremê nake û divê beriya her tiştî pirsgirêkên îstîhdamê li heremê bê çareserkirin. Er got ku restorasyonkirina dikanan bandorek neyî li ser karê wî kiriye û ji ber vê yekê dikana wî 70 roj girtî maye.