STENBOL - Endamên KESK'ê yên bi KHK'ê hatin îxrackirin, 27 hefte ye ne d içalakiyê de ne. Karkeran bal kişand ser çalakiya greva birçîbûnê ya Nuriye Gulmen û Semîh Ozakça jî û xwestin demildest daxwazên wan bên qebûlkirin.

Endamên KESK'ê yên bi Biryara di Hukmê Qanûnê (KHK) de ji kar hatin avêtin, bi mehan e di çalakiyê de ne. Kedkar hefteyê 3 rojan li Qada Azadiyê ya Bakirkoyê û li Altiyola Kadikoyê çalakiya xwe didomînin û 27 hefte li du xwe hiştin. Gelek kedkarên li Qada Azadiyê ya Kadikoyê tên gel hev, pankarta "Ji îxracên bê heq û bê hiqûq re na, em ê karê xwe bi dest bixin", "Em li gel Nuriye û Semîh in" û bi dirûşma piştgirî dan berxwedana Gulmen û Ozakça.

Mamosteyê bi navê Muhammed Secînçtekîn bi rêya KHK'ê ji kar hat avêtin, bi heftan e di çalakiyê de ye û aşkera kir ku ew bi biryar in ku çalakiya xwe berdewam bikin. Sevînçtekîn destnîşan kir ku ji ber ku wan aştî, azadî û vîna xwe diparast hatine îxrackirin û wiha got: "Dibe ku di qirika we de du parî biçe. Dê hin kes kebaban bixwin, hin kes jî pîvaza hişk. Ne yat, ne qat û ne jî kebab, tu tişt ji rûmetê ne girîngtir e." Sevînçtekîn xwest demil dest Gulmen û Ozakça serbest bên berdan û daxwazên wan bên qebûlkirin.

Bi heman armancê li Altiyola Kadikoyê jî çalakiya kedkaran berdewam dike û pankarta "Bila OHAL bê rakirin" û dem bi dem dirûşmên "Bila KHK bên betalkirin" û "Nuriye Semîh vîna me ne" tên berzkirin. Li ser navê çalakvanan Asli Akyuz daxuyanî da û aşkera kir ku desthilatdarî bi îxrac û binçavkirinan dixwaze KESK'iyan bê zar bike û piştrast kir ku dê nikaribin vîna kedkaran bişkînin.