STENBOL – Karkerên çandiniyê yên di demsalên havînê de ji bo findiqan berhev dikin tên Sakaryayê, gelek zarok, kal û pîr di nav wan de cih digirin. Welatiyan got ku "Li Cizîrê derfetên kar hebûna em ê nehatana vir." Karkeran bal kişand ser şertên kar û kêmbûna heqdestiyên xwe û aşkera kirin ku tekane hêvjiya wan aştî maye.

Karkerên demsalê û çandiniyê her sal ji bo debara xwe ji bajarên Kurdistanê diçin bajarên Tirkiyeyê, gelek ji wan di qezayên kar û trafîkê de jiyana xwe ji dest didin. Karkerên ji navçeya Cizîrê ya Şirnexê ji bo kar hatine gundê Parali ya Sakaryayê, rojê herî kêm 12 saetan bi 55 lîreyî dixebitin. Tevahiya malbatê karên çandiniyê dikin û di nava wan de zarok û ciwanên 14 û 20 salî gelekî zêde ne. Karkerên hatine herêmê, tenê daxwazeke wan hey, ew jî demek ji ya din zûtir aştiyek bê welatê wan.

'ROJÊ 12 SAETAN DIXEBITIN'

Ciwanê 20 salî Ramazan Danerî yê ji Cizîrê diyar kir ku di saetên serê sibehê de dest bi kar dikin, ji ber zextên leşker û siyasî yên li herêma xwe û ji ber kêmbûna kar bi gazin e. Danerî da zanîn ku ew rojê herî kêm 12 saetan dixebitin û wiha got: "Heke li Cizîrê derfetên kar hebûna em ê nehatana vir. Em 3 mehan ji bo amadekariya zivistanê dixebitin."

Danerî destnîşan kir ku ew bi traktorê diçin zeviyê û tên û wiha pê de çû: "Berî çend rojan piçek mabû traktora me wergere. Lê tiştekî ku em bikin tune, ji bo jiyanê pêwîstî bi xebatê heye." Danerî piştrast kir ku jiyana wan her dem di xetereyê de ye, lê qeza ne qeder e.

‘TEKANE XEYALA MIN AŞTÎ YE’

Danerî bal kişand ser tundiya li dijî kurdan û aşkera kir ku ew tu tiştî ji dewletê hêvî nake û wiha axivî: "Ev 50 sal e kurd di nava xebatekê de ne, lê kesî dengê me nebihîst. Wekîlên me tev girtî ne, kî/ê alîgirê me be, tê girtin. Em îro xwedî li aştiyê derkevin, em ê sibê terorîst îlankirin û bên girtin. Mixabin li vî welatî edalet tune. Tekane xeyalê min aştî û azadî ye."

‘ROJA ME BI XEBATÊ DERBAS DIBE’

Îdrîs S. (17) xwendekarê lîseyê ye, du sal e di karên çandiniyê de dixebite. Îdrîs S. got ku ew saet 05.30'an de dest bi xebatê dikin û wiha dirêjî da axaftina xwe: "Em her roj di heman saetê dest bi kar dikin. Em êvarê bi westyayî diçin malê û roj ji bo me diqede."

S. anî ziman ku wî gelekî bîra malbat û welatê xwe kiriye û piştrast kir ku heke pêwîstiya wan bi kar tune bûya, dê nehatana vir.

Elîf Çetîner - dîhaber