ENQERE – Hevseroka Giştî ya KESK'ê Aysun Gezen diyar kir ku Peymana Kar a Giştî ya ku bi hezaran peywirdarên cemaweriyê û kesên teqewîtbûyî eleqedar dike, memuran mehkûmê sefaletê dike, ji hêla Memur-Senê ve hatiye îmzekirin û aşkera kir ku Memur-Senê bi vê peymanê re bûye hevkarê lîstikeke mezin.

Hevdîtinên Peymana Kar a Giştî (TÎS) ku zema ji bo memûran a di navbera salên 2018 û 2019'an diyar dike, 3 milyon 200 hezar peywirdarên cemaweriyê û milyonek 900 hezar kedkarên cemaweriyê eleqedar dike. Peymana ku nîqaşên wê demek e didomin, di navbera Memur-Sen û hikumetê de hat îmzekirin. Li gorî hevhatina di saetên şevê de pêk hat, dê di 6 mehên destpêkê yên 2018'an de sedî 3,5, di nava 6 mehên piştre jî sedî 4, dîsa ji bo 6 mehên sala 2019 'an jî dê sedî 4 û ji bo 6 mehên piştre jî dê sedî 5 zem bê dayîn.

Hevseroka Konfederasyona Sendîkayên Kedkarên Cemaweriyê (KESK) Aysun Gezen, bertek nîşanî rêjeya zemê da û ev tişt got: "Ev peyman karkeran mehkûmê sefaletê dike, ev peyman kedkaran difroje û Memur-Senê jî ev peyman îmze kir."

‘LÎSTOKEK HAT LEYÎSTIN’

Gezen aşkera kir ku di pêvajoya TÎS'ê de Memur-Sen û hikumetê bi kedkar û karkeran re lîstokek leyîstiye û wiha got: "Ez ji xwe di serî de heta niha di warê pêşdîtina pêvajoya TÎS'ê de xwedî nêrîn bûm. Dema hejmar hatin parvekirin jî me got. Îhtimalek mezin dê bi rêjeya sedî 1 an jî sedî 0,5'an razî bin û ji bo vê jî lîstokek hat leyîstin. Dê hem Serokê Memur-Senê li ber çavê raya giştî nedin zorê, hem jî dê bonkoriya hikumetê bidin nîşan. Ev bi zelalî hat dîtin. Em vê peymanê wekî firotina memuran pênase dikin."

Gezen hevhatina peymanê ya di saetên şevê de jî bi bîr xist û piştrast kir ku ev ji lîstokekê wêdetir ne tu tişt e û wiha pê de çû: "Di saet 17.30'an de Memur-Sen bi lez û bez bertek da û got ku 'Ev ji bo me mijareke ku bê muzakerekirin e, lê îmze nayê avêtin', piştî 8 saetan gotina 'Ez di wê baweriyê de me em ê li hev bên' parçeyekê lîstokê ye. Lîstik di saetên şevê de hat temamkirin."