STENBOL – Xebatkarê Şaredariya Avcilara CHP’ê Ozgur Demîr, ji ber nekarî kira malê û fatureyan bide, xwest întîxar bike. Demîr diyar kir ku sê mehin mûçeyên xwe negirtiye û hêviya wî ji tu kesê nîne, tenê mafê xwe dixwaze.
Şaredariya Avcilarê 3 mehin mûçeyên 120 xebatkarên Midûryeta Park û Baxçeyan û 400 xebatkarên Midûryeta Karên Fen a Şaredariyê nade wan. Xebatkar ku ji bo mûçeyên xwe bigirin 19 rojin naçin kar. Xebatkaran diyar kirin ku heya ew mûçeyên xwe negirin, dê çalakiya xwe ya kar berdanê bi dawî nekin. Yek ji van karkeran bavê 4 zarokan Ozgur Demîr di rojên derbasbûyî de, dema xwest ji malê derbikeve rastî xwediyê malê hat û li ser kîraya ku nikare bide, nîqaş derket. Demîr piştî nîqaşê ku diçe cihê kar, ji ber nikare kira û faturayên malê bide û bifikara pêşeroja zarokên xwe dikeve nava lêhûrbûnê û bi benekê li cihê kar dixwesa xwe daleqîne. Hevalên Demîr ew ji hewldana întîxarê xilas kirin. Demîr diyar kir ew maf dide xwediyê malê û wiha axivî: “Min jî dixwest ez kireya malê bidim, lê mûçeya min nadin min. Dinava me de nîqaşeke nexweş der bas bû. Piştî nîqaşê hatim şantiyê. Hemû tişt dinava nîvsaetê de çêbû. Ez nizanim min ben çawan amade kir. Tiştekê ku bi plankirî nebû. Hemû tişt komî ser hev bû û mirin hat hişê min. Lê hevalên min ez xelas kirim.”
'EZ MAFÊ XWE DIXWAZIM’
Demîr da zanîn ku li gel van hemûyan şaredar bêdenge û wiha got: “Şaredariyê pênc roj destûr da min û xwest min rehet bikin. Ez ji kesekê rehetbûnê naxwazim, tenê mafê xwe ji bo zarokên xwe dixwazim.”
'TENÊ FIKARA MIN ZAROKÊN MIN E'
Demîr anî ziman ku çar zarokên wî hene û wiha pê de çû: “Berî sê mehan ez ji hevjîna xwe veqetiyam. Ez li zarokên xwe mêze dikim. Di mêzekirina zarokan de zoriyê dikişinim. Gelek kesên derdora min dixwazin ez zarokên xwe bidim dibistanên şevîn qursên Qur’an ê. Bi salan ez ji bo hilbijartinên CHP’ê xebitîm û min deng komkirin. Dema pêkanên şaredariyek demokratîk û civakî yên wiha dibînim, hirsa min mezin dibe.”
'NAXWAZIN EM CEJNA XWE BI ARAMÎ PÎROZ BIKIN’
Demîr dest nîşan kir ku zarokên wî bûn şahidê ku bavê wan sê mehin mûçe negirtiye û li ber xwe dide. Demîr aşkar kir ku zaroka wî ya mezin Gozde Eylem bang li Şaredara Avcılarê Handan Toprak Benlî kiriye ku ew naxwazin cejna xwe bêperetî pîroz bikin û dixwazin kîra mala xwe bidin.
‘KARKERÊN NIKARIN NAN BIBIN MALÊ HENE'
Sekreterê Malî yê Hejmar 2 a Karê Şaredariyê Savaş Dogan jî diyar kir ku gelek karker nikarin nan bibin malê xwe, lê bi rêbaza palûte lêçûnên mutbexên xwe temam dikin. Dogan da zanîn ku ew pêvajoyeke pêşiya wê vekirî dijîn û derûniya wan xerab bûye.