ŞIRNEX – Alîkarê Hevserokê Giştî yên HDP'ê Nadîr Yildirim, beşdarî 2'emîn kongreya asayî ya HDP'ê ya Cizîrê bû û diyar kir ku Cizîr li dijî hemû êrîşan li ser piyan e û wiha got: "Ruhê têkoşînê dîsa li Cizîrê geş dibe. Cizîr her dem li dijî hemû êrîşan li ser piyan e."

Rêxistina Partiya Demokratîk a Gelan (HDP) ya Cizîrê 2'emîn kongreya xwe ya asayî pêk anî. HDP'ê li avahiya xwe kongreya xwe pêk anî. Alîkarê Hevserokên Giştî yê HDP'ê û Parlamenterê Wanê Nadir Yildirim, Parlamentera Şirnexê Leyla Birlik, Endamên Meclîsa HDP'ê Nuran Îmîr, rêveberên HDP'ê û malbatên kesên di qedexeyên derketina kolanên li Cizîrê de ji yana xwe ji dest dan tev li kongreyê bûn.
Salon bi alên HDP'ê hat neqişandin. Wêneyê Cemile Çagirga ya 13 salî ku li Cizîrê hat qetilkirin hat vekirin.

‘CIZIRÊ ÇONG DANANÎ'

Kongreyê bi rêzgirtin û hilbijartina dîwanê dest pê kir. Pişti hilbijartina dîwanê Endama Meclîsa HDP'ê Nuran Îmîr axivî û wiha got: "Kurdan bi vê têkoşîna xwe nîşan da ku di sedsala pêşiya me de bêyî kurdan li Rojhilata Navîn tu gav nayê avêtin. Kurd di rewşek pir kritîk û dijwar de darbas dibin. Ev bi xêr û sayeya kesên di vê rêyê de bedel dan pêş ket."

Parlamentera HDP'ê ya Şirnexê Leyla Bîrlîk jî anî ziman ku Cizîr her dem rastî êrîşan hat û wiah got: "Di hemû êrîşên dîrokê yên li dijî Cizîrê de, Cizîrê tu caran serî û çong netewandiye. Îro gelê Cizîrê li dijî OHAL’ê têdikoşe."

Alîkarê Hevserokê Giştî yên HDP'ê Nadîr Yildirim jî anî ziman ku ji ber li Cizîrê ye hestiyar bû û wiha got: "Mirovahiyê dîroka şoreşgeriyê dîsa bi bîra wan xistiye. Em di demek dijwar de derbas dibin. Hemû ked û têkoşîn ji bo serkeftinê tê dayîn. Têkoşina azadiyê bi ked, bedel û têkoşînê mezin dibe. Bi ked û bedelan têkoşîna azadiyê mezin bû û li hemû cîhanê belav bû. Bi têkoşîna azadiya kurdan kurd li Rojhilata Navîn bûn xwedî gotin û biryar. Divê hêvî û baweriyên her kesî li ser piyan û zindî bin. Îro li dijî gelan şerê derûnî tê meşandin. Lê em ji her demê bêtir xurt û bi hêz in. Divê em ji her demê bêtir di ber xwe bidin."

Ruhê têkoşînê li Cizîrê şîn bûye û Gelê Cizîrê li dijî hemû êrîşan li ser piyan e."