ENQERE – Piştî Nobeta Wijdan û Edaletê ya HDP’ê bi dawî bû, niha jî HDP plansaziya du mehan derxist û dê li 120 navendan rêze çalakiyên cuda lidar bixe. HDP dê bi gel re bicive.

Partiya Demorkatîk a Gelan (HDP), piştî di 20’ê tîrmehê de li Stenbolê deklarasyona “Plana Têkoşîna Demokrasiyê” aşkere kiribû û mehek li 4 bajarên mezin “Nobeta Wijdan û Edaletê” lidar xist. Nobeta Wijdan û Edaletê li Amed, Stenbol, Wan û Îzmîrê pêk hat û bi dawî bû. HDP’iyan daxwaza xwe ya ji bo edalet, demorkasî û wijdan di asta herî jor de anî ziman. Piştî nobet xelas bû vê carê jî çav li ser plansaziya çalakiyên nû ye. Dê konaxa duyemîn a HDP’ê civînên gel be û vê plansaziyê amade dike.

LI 120 NAVENDAN RÊZEÇALAKÎ

Piştî nobeta li çar bajaran dê vê carê jî HDP, li 120 navendan civînên gel, şahî, mitîng û panelan lidar bixe û bi gel re bicive. Starta plansaziya konaxa duyemîn li navçeya Yuregîr a Edenê dest pê kir û dê ev plansazî heta dawiya meha cotmehê bidome.

Li Edene, Mêrdîn, Mugal, Osmaniye, Antalya, Aydin, Denîzlî, Hatay, Îzmîr, Şirnex, Balikesîr, Amed, Kocaelî, Qers, Colemêrg, Sêrt, Riha, Konya, Çewlig û Stenbolê rêzeçalakî dê bên lidarxistin û heta 27’ê cotmeha 2017’an dewam bike. Dê di van çalakiyan de parlamenter û endamên MYK’a ya HDP’ê cih bigirin. Di der barê pêvajoya tê de derbas dibin dê nîqaşan bi gel re bidin meşandin. Encamnameya van çalakiyan û civînên bi gel re dê bên nîqaşkirin û heta konaxa plasnaziya sêyemîn ku heta çileyê 2018’an kongreya asayî pêk bê wê start bê dayîn.

DI 4’Ê MIJDARÊ DE ÇALAKIYÊN GIRSEYÎ

Di heman dîrokê de 4’ê mijdara 2016’an de ku parlamenterên HDP’ê hatin girtin çalakiyên girseyî tên plankirin. Tê payîn ku beşek mezin a çalakiyan dê li ber girtîgehên parlamenterên HDP’ê lê girtîne pêk bê.

MITÎNGÊN HERÊMÎ Û NAVENDÎ

Di heman demê de li gel van çalakiyan ji bo mitîngên mezin jî amadekarî tên kirin. Li Amed û Stenbolê mitîngên mezin ên navendî bên lidarxistin. Li bajarên din jî dê mitîngên herêmî pêk bînin.

Vê hefteyê li bendeye ku dîroka plansaziya bi du konaxan a çalakiyan zelal bibe. Hem ji bo encama çalakiyên nobetê û hem jî ji bo plansaziya pêşerojê vê hefteyê dê HDP bênavber civînan lidar bixe û plansaziya xwe aşkere bike.

MECLÎSA JINAN SIBÊ DÊ KOM BIBE

Sibê dê Meclîsa Jinan a HDP’ê civîna xwe lidar bixe. Roja çarşemê jî wê Meclîsa Partiyê (MP) ya HDP’ê kom bibe. Roja înê jî dê Lîjneya Rêveberiya Navendî (LRN) ya HDP’ê li ser van hemû mijar û rojevan nîqaşan bide meşandin.