QERS – Li herêma Çemçê ya bi ser Kaxizmanê ve di bomberankirinê de 5 endamên HPG’ê jiyana xwe ji dest dabûn. Ji 5 cenazeyan jê 4 cenaze piştî 33 rojan li heman herêmê hatin definkirin. Bavê endamê HPG’ê Omer Ozrek, Abdulkerîm Ozrek wiha got: “Dîmenên li ber çavan bi xof bûn. Cenaze şewitibûn. Diyar bû ku wahşet û îşkence li ser cenazeyan pêk anîne.”

Li qada Geliyê Hacê ya bi ser herêma Çemçê ya navçeya Kaxizmanê ya Qersê, di 6’ê tîrmehê de di bomberankirinê de 5 endamên HPG’ê jiyana xwe ji dest dabûn. Bi hinceta “Li herêmê operasyon didome” 33 roje cenazeyê endamên HPG’ê Omer Ozrek (Botan Êrîş), Mehmet Bîrgul (Sîmko Agirî), Ferît Polat (Taylan Ozgur) û Serhat Boztaş (Dara Hemzê) dihatin rawestandin. Malbata 4 HPG’iyan piştî 33 rojan li herêma bomberankirinê cenazeyên zarokên xwe definkirin.

Bavê endamê HPG’ê Ozrek, Abdulkerîm Ozrek behsa hovîtiya li ser cenazeyan pêk hatiye kir. Ozrek diyar kir ku cenazeyên zarokên wan bi awayekî perçekirî û şewitandî komkirin û kêleka hev defînkirin.

‘LEŞKERAN HEQARET KIR Û EM ZIVIRANDIN’

Ozrek got ku li gel ew gelek caran çûne Qers û Kaxizmanê lê tu rayedaran li wan guhdar nekiriye. Ozrek da zanîn ku dozgerê Kaxizmanê destûra wan dida dema ew diçûn herêmê ji aliyê leşkeran ve dihatin astengkirin û got: “Dozger destûra me da. Em çûn herêmê lê leşkeran li me heqaret kirin û paş de zivirandin. Herî dawî ji me re hat gotin ku operasyon xelas bibe em dikarin cenazeyê xwe hildin. Em duh dîsa çûn herêmê. Ji me re gotin ‘biçin hildin.’ Ji 4 malbatan em 15 kes çûn qadê û yên wir dizanibûn rê nîşanî me dan.”

‘DÎMENÊN QADÊ BI XOF BÛN’

Ozrek destnîşan kir ku cenaze şewitîbûn û wiha axivî: “Me dest bi lêgerîna cenazeyan kir. Me xwe gihand 4 cenazeyan û hilda bir Tepeyê Aşik Dede. Dîmenên me dîtin pir bi xof bû. Hemû cenaze şewitîbûn. Wan bi bombeyên kîmyewî qetil kiribûn. Serê cenazeyekî tune bû û cenazeyên din jî nedihatin naskirin. Diyar bû ku wahşet û îşkence li ser cenazeyan pêk anîbûn.”

‘LI GEL WAHŞETÊ DÎSA DIBÊJIM AŞITÎ’

Ozrek anî ziman ku ne mimkûn bû ku cenazeyên bi wî halî ji herêmê bînin û piştî 4 goran kolan wecîbeyên olî yên cenazeyan pêk anîn û definkirin. Ozrek ev tişt got: “Cenaze bi temamî hatibûn perçekirin. Du cenaze nedihatin nasîn. Cihê me lê cenazeyan defin kir pir ne bi ewle ye. Cihek bi tat bû. Lê belê ji ber ku me cenazeyên zarokên xwe defin kir ez hinek rehetim. Li gel ku vê wahşetê bi serê kurê min ve anîne jî dîsa dibêjim ‘aşitî.’ Bila ne gerîla ne jî leşker bên kuştin.”