STENBOL – Seroka Şaxa ÎHD'ê ya Stenbolê Prz. Gulseren Yolerî ku tevî 41 kesên hatin binçavkirin û hat berdan, pekanînên di bin çavan de vegot. Yolerî, diyar kir ku li midûriyeta polîsan li gorî dema berê yekîneyên îşkenceya taybet hatine perwerdekirin û gîhandin.
Li Beşîktaşa Stenbolê di 5’ê tebaxê de parêzvanê mafê mirovan xwestibûn bi pêkanîna çalakiyê piştgirî bidin greva birçîbûnê ya Nuriye Gulmen û Semîh Ozakça. Lê polîsan êrîşî çalakiyê kiribû 41 parêzvanê mafê mirovan binçav kiribûn. 41 parêzvan derxistin Edliya Çaglayana Stenbolê û îfadeyên wan hat girtin. Seroka Şaxa ÎHD’ê ya Stenbolê Prz. Gulseren Yolerî jî di navde 41 parêzvanê mafê mirovan li dadgehê hatin berdan. Prz. Gulseren Yolerî, çavderiyên xwe yên di bin çavan de parve kirin. Yolerî, diyar kir ku ji dema hat binçavkirin û heta hat berdan, destê wan ji pişt ve hat kelepçekirin û wiha got: "Destê me ji pişt ve kelepçe kirin û em darp kirin. Em hem rastî îşkenceya fîzîkî hatin hem jî rastî îşkenceya hiqûqî hatin. Em di demên berê de jî pir rastî îşkenceya fîzîkî hatin. Em bûn şahidên îşkenceyên giran. Îro ev îşkence dubare xwe dide der. Ev bêtir mirovan dixe nava fikaran. Bi taybetî binçavkirina min a dawî û pêkanînên li ser me nîşan dide ku yekineyên îşkenceyê bi taybetî hatine perwerdekirin û gîhandin. Ev yekîne bi armanca cezakirinê tev digerin.
LI MIDÛRIYETA POLÎSAN YEKÎNEYÊN TAYBET ÊN ÎŞKENCEYÊ HENE
Yolerî, da zanîn ku dema ew di bin çavan de li dijî îşkenceya polîsan derketin, polîsekî jêre got: "Bizanibin ku ev fermana taybet e. Piştî wê ji min jî nepirsin." helwesta xwe nîşan daye. Li gorî berê kesên ji bo îşkenceyê taybet hatine perwerdekirin hene. Di salên dawî de bêtir komeleya me rastî îşkenceyê hatine. Dîsa hemû welat bi awayekî kontrol û edlî kirine girtîgeh. Mafê azadiya gerê û seyranê, ji destê mirovan hatiye girtin. Mafê îfede û bertekan ji destê mirovan hatiye girtin. Bi qedexe û zordariyê hemû mafê kesên muxalif ji destê wan hatiye girtin û mafê îtîrazê tune ye. Kesên nerazibûnên xwe bi daxuyaniyê û xwe îfadeyê tînin ziman rastî astengiyan tên. Mirov dikare bêje li Tirkiye her kes wekî girtiyan in.
'DOZGER BÊYÎ ME BIBÎNIN LI GORÎ DOSYAYÊ BIRYAR DIDIN'
Yolerî, di dawiya axaftina xwe de bal kişand ser helwesta dozger û wiha got: "Hevalên me yên hatin binçavkirin, tu kes ji wan, ji sucdariya der barê wan de nehatin darizandin. Yên îtiraz kirin û nekirin rastî îşkenceyê hatin. Li ser bedena hin hevalên me şopa îşkenceyê heye. Gelek hevalên me jî, ji ber rastî îşkenceya teknîkî hatin şopa îşkenceyê li ser bedena wan nayê ditin. Îşkenceya li pişt guhê wan û li ser milê wan ku şopa wê xuya nabe kirin. Em dizanin tundiyek pir zêde kirin. Em dibînin ku îşkence tê kirin, lê şopa wê xuya nabe. Em bûn şahidê vê yekê jî. Ji ber ve yekê em dibêjin yekîneyên îşkenceyê niha bêtir bi pisporî îşkenceyê dikin. Bêtir îşkenceyek derûnî pêş dixin. Ev jî nîşan dide ku ji niha û şunde divê em bêtir li ser vê yekê bixebitin. Dozger, li dijî îşkenceyê tu tiştî nakin. Tenê li dosyayê dinerin û der barê kesan de biryarê didin. Beyî ku bersûc bibînin û mafê parastinê bidin me û parêzerê me li ser dosyayê lêkolîn dike û biryarê dide."