ÎZMÎR - Huqûqnasên ku tevlî Nobeta Wijdan û Edaletê ya di 15'ê Tebaxê de li Qada Gundogdûyê destpê bike bibin, bang li hemû huqûqnasan kirin û diyar kirin ku li welatekî ku ewqas neheqî lê hene, lêgerîna li mafan peywira huqûqnasan e."

Nobeta Wijdan û Edaletê ya HDP'ê dê herî dawî li Îzmrê bê girtin. HDP'yî dê di 15'ê Tebaxê de li Qada Gundogdûyê nobetê dewir bigirin, niha amadekariyên nobetê dikin. Parêzerên di nav nobetê de cih bigirin banga tevlîbûnê kirin.

Serokê Şaxa Komeleya Huqûqnasên Hevdem (ÇHD) a Îzmîrê ku bi KHK'ê hat girtin Serdar Gultekîn, diyar kir ku bêedaletiya li hemû derdorên civakê xwe dide der mirovan diêşîne û di serdemeke wisa de anîna cem hev a têgehên wek "Wijdan" û "Edalet"ê zaf watedar û girîng e. Gultekîn, dest nîşan kir ku ew ê di nobetê de cih bigirin û wiha got: "Em ji sala 1974'an ve ji bo edalet, wekhevî û azadiyê têdikoşin. Ji ber vê yekê ji bo edalet, wekhevî û azadiyê em bang li hemû huqûqnasan dikin da ku tevlî vê nobetê bibin."

'JI BILÎ KUÇEYÊ TIŞTEK NEMA'

Gultekîn, tevdîra ewlehiyê ya di meşa edaletê ya CHP'ê de hat girtin bi bîr xist û diyar kir ku, lê belê nobeta HDP'ê hatiye dorpêçkirin û gel tên astengkirin. Gultekîn, dest nîşan kir ku HDP'ê partiya mezin a sêyemîn a Meclîsê ye û wiha domand: "Li gel vê jî heke wek partiyeke siyasî fealiyetên wê bên astengkirin, li parkekê hevdîtina wê ya bi gel re bê astengkirin, nexwe divê li vir em behsa huqûqê nekin. Ev ji bilî faşîzmê pêvtir ne tu tişt e. Mirov vê rewşê tenê dikare bi huqûqa cezayî şîrove bike. Heke li Tirkiyeyê daraz hebûna, dê der barê hemû kesên ku nahêlin gel têkevin parkê lêpirsîn bihatanan destpêkirin û ceza li wan bihatanan birîn. Lê em li Tirkiyeyê tersa vê yekê dibînin."

Parêzer Dînçer Çalim jî, diyar kir ku piştî hewldana darbeyê ya 15'ê Tîrmehê AKP polîtîkayên çewisandinê zêdetir kirine û wiha axivî: "Di demên dawî de ji bo li girtîgehan bisepînin pêkanîna kincên yektîpî xistine rojevê. Em di serdemeke ku li edliyeyan ewlehiya dadweran tune ye re derbas dibin. Hema bêje li ser hemû dadweran zext û zorî hene. Tu tişt tune ku AKP'ê bi riya darazê bi dest nexistiye. Ji ber vê di dest kesên muxalîf de ji bilî kuçeyan tu tişt nemaye. Ji ber vê yekê divê em di nobetê de ji bo maf û azadiyên xwe bibin xelek."

Parêzer Tugçe Nazli Akin jî, dest nîşan kir ku li Tirkiyeyê pergala edaletê li ser xeteke polîtîk tê xebitandin û li gor vegotinên îktîdarê şikil digire. Akin, anî ziman ku ew li edliyeyan bi gelek pirsgirêkan re rû bi rû dimînin û êdî piştguhkirina ewqas pirsgirêkan nayê qebûlkirin. Akin, dest nîşan kir ku tenê pêkanînên li girîtgehan jî sedema beşdarbûyîna nobetê ye û wiha got: "Dibe ku ev nobet bibe çirûska ewil a hevpar. Me di dema berxwedana Parka Geziyê de ev yek dît. Belkî ev nobet bibe çirûska berxwedana duyemîn. Ji bo beşdarbûna nobetê em bang li her kesî dikin."