AYDIN - Ayden Akturk, li atolyeya xwe ya li quntarên Çiyayê Latmosê can dide heriyê. Akturk, bi berhemên xwe zor û zehmetiyên ku jin bi wan re rû bi rû dimînin vedibêje.
Ayden Akturk (65) ku li quntara Çiyayê Latmos ê navçeya Kûşadasi ya Aydinê atolyeya sermaîkê vekir, ji sala 2004'an ve peykerên fîguratîf çêdike. Akturk, bi berhemên xwe jinê û zor û zehmetiyên ku jin bi wan re rû bi rû dimînin vedibêje û can dide heriyê. Mamosteya Wêneyan Ayden Akturk, piştî ku teqawîd bû atolye vekir û diyar kir ku ji her derê atolyeya wê bêhna xeyalên wê tê. Akturk, anî ziman ku heta niha ew beşdarî gelek pêşangehan bûye û 2 caran jî wê bi awayekî şexsî pêşangeh vekiriye.
Akturk, diyar kir ku dema wê nû atolyeya xwe vekiriye herî zêde li ser fîgurên heywanan rawestiyaye, lê paşê li ser fîgurên mirovan û herî dawî jî ji bo balê bikişîne ser zor û zehmetiyên ku jin pêrgî wan tên ew li ser fîgurên jinan hûr bûye. Akturk wiha axivî: "Bûyerên ku jin pêrgî wan tên û hin kesên di bin navê îslamiyetê de tahdê li jinan dikin bandorê li min dike. Dema dayik ewladên xwe winda dikin, perîşaniya jinan a di dema koçberî û şer de hemû bandorê li hunera min a seramîk dikin. Dema ez bûyerên civakî di hunera xwe ya seramîk de vedibêjim kêfxweş dibim. Êdî bi jinê can didim heriyê."
‘DIXWAZIM BI HUNERA XWE PEYAMÊ BIDIM'
Akturk, balê dikêşe ser êşên ku jin dikêşin û hewl dide di xebatên xwe de jinan bide der. Akturk, anî ziman ku bi taybetî ew dixwaze li hemberî nêzîkatiyên hikûmetê yên der barê jinan de bi hunera xwe peyamê bide.
‘DIVÊ HUNERA SERAMÎK HER TIŞTÎ VEBÊJE'
Akturk, diyar kir ku berî ku ew fîgur çêbike pêşî ew heriyê distrê, paşê ew şikil dide heriyê. Akturk wiha behsa zor û zehmetiyên xwe kir: "Hûn ew qasî kedê didin, lê di navberê de hinek jê diderizin, dişikên. Carinan ew qalibê ku tu dixwazî dernayê, lê dîsa jî dixebitim. Dema bixwazim di peykerekî de serê jinê çêbikim, carinan hefteyekê dixebitim. Dema mirov ji karê xwe hez bike li ber çavan nayê. Demeke diyar ê vî karî tune ye." Akturk, dest nîşan kir ku ji bo hunerê herî malzemeyeke zaf xweşik e û ji bilî heriyê ew kilsê jî bi kar tîne.
Akturk, anî ziman ku ew li Çiyayê Latmosê li gundekî dijî û heywanên wê hene. Akturk, got ku ew li gund dixwaze vê hunerê hînî ciwanan bike.
Akturk, anî ziman ku li gundê wan darên fisteqan û zeytûnan hene, lê belê tê xwestin ku Çiyayê Latmosê bê dar bê hiştin û wiha got: "Di pêşerojê de dê çiyayekî ku em ji zarokan re bihêlin nemîne. Em ê xwezayeke kirêt wek mîrate bihêlin." Akturk, anî ziman ku ew hewl dide ku berhemnên der barê texrîbata xwezayê de çêbike.
Akturk, nêzîkatiya hikûmetê ya ji bo huner û hunermandan jî rexne kir û wiha got: "Hemû şaxên hunerê xweşik in, lê di qada perwerdehiyê de der barê hunerê de tu tişt nema. Ji bîr nekin, ji bo mejiyê zarokan bixebite divê destê wan jî bixebite. Niha li Tirkiyeyê der barê hunerê de tu tiştek nayê hilberandin, em her tiştî kopî dikin."