WAN – Met û cîranê Lorîna 3 salî li wê mêze dikin, pîra wê ya ku ji wê re dayiktiyê dike û kalê wê girtî ne. Lorîn ji bo wan bibîne heftê de 2 caran diçe Girtîgeha Tîpa T a Wanê.

Behiye Bor (42) û hevjînê wê Yusuf Bor (50) ên li taxa Xaçortê ya navçeya Rêya Armûşê ya Wanê dimînin, piştî hatin girtin, kesê ku li Lorîna piçûk mêze bike neman. Dema dayika Lorînê diwelide, jiyana xwe ji dest dide, bavê wê ji ber ku bi roj dixebite, bi dorê 2 metên wê yên zewicî ne û cîranên wan li Lorînê mêze dikin. Kal û pîrên Lorîna piçûk ji wê re dayiktî dikirin, piştî hatin girtin, Lorîn hefteyê 2 rojan diçe Girtîgeha Tîpa T a Wanê û kal û pîra xwe ziyaret dike.

DESTPÊKÊ PÎRA WÊ, PIŞTRE KALÊ WÊ HAT GIRTIN

Pîra Lorînê heta meha Îlonê ya 2016'an ji wê re dayiktî kiriye, li ser îxbarekê, bi îdiaya "Alîkariya rêxistinê kiriye" hat girtin, piştre kalê wê Yusuf Bor li wê mêze kir. Di meha Tîrmehê de ji ber heman giliyan, der barê Yusuf Bor de jî biryara girtinê hat derxistin û 4 sal ceza li Bor hat birîn.

LORÎN HEFTEYÊ 2 ROJAN DIÇE GIRTÎGEHÊ

Meta wê Jiyan Bor diyar kir ku ew her rojên Duşem û Pêncşemê Lorînê dibin girtîgehê û aşkera kir ku ev bandoreke xirab li ser Lorînê dike û wiha got: "Ji xwe rewşa aborî ya malbata me ne baş e. Bavê Lorînê ji bo li malbat, bav û dayika xwe mêze bike, sibê ji mal dertê û heta êvarê nayê malê. Ez û xweşka xwe jî em zewicî ne. Ji ber ku em nêzî wan in, em lê mêze dikin. Em zarok, karê xwe yê malê li gorî wê amade dikin. Hemû cîran jî lê mêze dikin. Lê di vî temenê xwe de divê heftê de 2 caran biçe girtîgehê. Em jî ruxmî hemû bêedaletiyê têkoşîna xwe dewam dikin."

DEMA DAYIKA MIN LORÎNÊ DIBÎNE…

Bor destnîşan kir ku dayika wê demên borî jî gelek caran hatiye girtin û piştrast kir ku dayika wê ne ji ber pirsgirêkên tenduristiyê, bi hesreta Lorînê zehmetiyan dikişîne. Bor aşkera kir ku dayika wê ya ku nexweşa astimê ye, 3 sal ceza li wê hatiye birîn û wiha pê de çû: "Hêj em piçûk bûn dayika min bi xweşka min re ket girtîgehê. Wê demê tenê ji bo xweşka min bigirin girtîgehê, bavê min rabû temenê wê dirêj kir û ew bir teslîmê dayika min kir. Ji be ku em hemû zarok bûn û kes tune bû li me mêze bike. Wê demê jî 2 salan di girtîgehê de ma. Berê li ser îxbarekê doz hatibû vekirin, dozger 3 sal ceza lê birîn. Ev qasî salekê ye di girtîgehê de ye, dê ew qas jî bimîne." Bor aşkera kir ku di dema welidandinê de dayika Lorînê jiyana xwe ji dest daye û axaftina xwe wiha bi dawî kir: "Dayika min dixwest ew tenêbûna dayika xwe nejî. Niha dema em Lorînê digin girtîgehê, dayika min demek dirêj bi ser xwe de nayê."