MÊRDÎN - Abdî Aykut ê li Gundê Xirabê Bava di 2'ê Adarê de hat girtin û di 17'ê Tebaxê de hat berdan, îşkenceya 14 rojan li wî û gundiyan hatiye kirin vegot. Aykut wiha got: "Di hewaya sar de em li pişt panzêrê girêdan û bi erdê re kişanin. Hêj ji ber îşkenceya li min hat kirin û şopa wê li ser bedena min heye nikarim li ser piyan rawestim.
Walîtiya Mêrdînê di 11'ê Sibata 2017'an de qedexeya derketina derve îlan kir û piştre tîmên taybet û polîsên taybet li Gundê Xirabê Bava yê Nisêbînê bi ser gund û malan de girt. Piştî leşker û tîmên taybet 14 rojan gund dorpêç kir û îşkence li welatiyan kir, di 2'ê Adarê de tîmên taybet Abdi Aykut binçav kirin û li dadgehê hat girtin. Aykut ê rastî îşkenceya giran hat û bi îşkenceya lê hatiye kirin ket rojeva cîhanê di 17'ê Tebaxê de serbest hat berdan. Aykut ê bi îdîaya “Endamtiya rêxistinê hat binçavkirin û
girtin, piştî hat berdan serpêhatiyên xwe ji dihaberê re vegot. Aykut, beriya dest bi axaftinê bike şopa îşkenceya lê hatiye kirin û hestiyên wî şên hatine şikestin nîşan da û wiha axivî: “Di pêvajoya ku ez hatim binçavkirin, gelek kes dizanin çi bi serê me gundiyan de hat.
‘ÇAVÊ MIN GIRÊDAN Û EZ DERXİSTIM DERVE
Aykut, anî ziman ku dema qedexeyan dest pê kir li mala malê xwe dima û wiha got: "Ji destpêka qedexeyê heta dawî agahiya me ji tu gundiyan çênebû. Di roja 6’emîn a qedexeyan de polîs û tîmên taybet ên bi rûpoş bi ser mala me de girtin û gotni 'Abdi Aykut tu ye?' Piştî min got erê berê çekan dan min. Çek xistin çênîka min. Çend kesên din jî bi beden û serê min girtin. Dest bi lêdanê kirin. Ji ber lêdanê ez ketim xwar. Piştî ez ketim xwar, çavê min girêdan û ez derxistim derve. Xxestin ez bimeşim. Lê ji ber ku çavê min girêdayî bû û li min dabûn ez ketim xwar. Piştî ez ketim xwar gotin 'Çawa tu nameşe? û bi qundarên çekê li pî û milê min xistin. Xwîn ji devê min hat. Dema ez ketim xwar serê min li dîwar ket."
'EZ LI PEY PANZÊRÊ GIRÊDAM Û BI ERDÊ RE KAŞ KIRIM'
Aykut, anî ziman ku heta wê saetê ji bilî çend kezan dizanîbû çend kes li gund hatine binçavkirin û wiha berdewam kir: “Ji ber demsala zivistanê her der bûz girtibû. Hewa pir sar bû. Piştî demekê destê min girê dan. Hemû cilên li ser min perçe bûbûn. Destê min girêdan û ez avêtim pişt panzêrê. Ez li pişt panzêrê kaş kirim. Hem ez kaş kirim û hem bi pêhn û kontara çekan li min xistin. Hem li piyê min û hem jî li serê min dan. Her dem çek dixistin serê min."
JI BER ÎŞKENCEYÊ EZ JI SER HIŞÊ XWE DIÇÛM'
Aykut, destnîşan kir ku li gund 2 rojan di bin çavan de ma û bê navber rastî îşkenceyê hat û wiha lê zêde kir: “Ji ber hewa sar bû û her dem li min îşkence dikir ez nedihatim ser hişê xwe. Bi roj ez li cem xwe didam rawestandin. Bi şev jî em dibirin cihekî din. Her dem ji min re digotin 'bêje' her çend min digot 'ez çi bêjim ez tiştekî nizanim' jî dîsa li min dixistin. Ez dibirim cihên cuda û li min didan. Carekê ez birim ser dîwar û gotin 'em dê de ji dîwar bavêjin' Ji ber ku ez nekarîbûm bimeşin min xwe neavêtibû. Vê carê wan ez ji wir avêtim. Ez li ser piştê ketim. Ji ber kevirên li erdê li laşê min şop û birîn çêbûn."
'EZ DI NAVA ÊŞÊ DE DI QILQILÎM'
Aykut, destnîşan kir ku ji ber rastî îşkenceyek gelek dijwar hat navdilê wî zerar dîtin û di hemû bedena wî de birîn çêbûn û wiha berdewam kir: "2 roj şûnde li şûna min têxin ambulansê ez avêtim hundirê panzêrê û ez birim Qereqola Polîsan a Nisêbînê. Tu mudaxaleyên tipî li min nekirin û tevî wê êş û bîrînan ez avêtim nezaretxaneyê. Ez heta serê sibê di nava êşan de vegezyam. Min heta serê sibê êş û jan kişandin. Çend kesên li nezaretxaneyê bûn alîkarê min. Çend rojde dîsa îşkence li min kirin û piştre ez avêtim nexweşxaneyekê û birim nexweşxaneyek Mêrdînê. Ji ber xwîn li dora kezeba min kom bûbû ez emeliyat bûm. Bêyî tedawiya min xelas bibe ez dîsa birin Nisêbînê û derxistim pêşberi dadgehê. Piştî ez hatim girtin her ji 15 rojan destê min kelepçe dikirin û ez dibirim bijîşk. Ez li girtîgehê cardin emeliyat kirim. Şert û mercên girtîgehê jî pir xerab bûn û min li girtîgehê jî êşên mezin kişandin. Ez 6 mehan girtî mam û her ji 15 rojan destê min kelepçe kirin û ez birim bijîşk. Hewa pir germ bû. Em
30-35 kes di kawîşekê de diman. Girtiyên li cem min dibûn alîkarê min."
‘MIN NEKARÎBÛ XWARIN BIXWARA'
Aykut, daxuyand ku ew neheq rastî îşkenceya giraan hat û neheq hat girtin û wiha dirêj kir: "Ez bi zorê li ser piyan dikarim rawestim. Nikarin bi xwe pêdiviyên xwe bibînim. Hêj şopa qundarên çekê li ser bedena min heye. Perdê guhê min zerar ditin. Ez niha nikarim baş bibhîzim. Nikarin bi hêsanî xwarinê bixwim. Sê parsuyê min şikestin. Ez nikarim biçim tuwaleta xwe bikim. Nikarim çend deqîqeyan li ser piyan rawestim."
LI QERABÊ BAVA ÇI BÛBÛ?
Walîtiya Mêrdînê di 11'ê Sibata 2017'an de Xerabê Bava jî di navde li gelek gundê Nisêbînê derketina derve li welatiyan qedexe kir. Piştî 2'ê Adarê leşker û tîmên taybet tevahiya Gundê Xirabê Bava dorpêç kirin û hemû welatî di îşkenceyê re derbas kir. 39 kes hatin binçavkirin û welatiyên birin qereqolê xwestin bibin sîxur. Abdi Aykut ku piştî demekê agahî jê nehat girtin, rastî îşkenceya giran hat û piştî binçavan li dadgehê hat girtin. Aykut, piştî hat girtin şandin Girtîgeha Tîpa E ya Mêrdînê.
WAZÎR SOYLU: EW MIROV MALOVANIYA TERORÊ DIKE
Dema dîmen û wêneyên Aykut ên rastî îşkenceyê hatine di medyaya civakî de belav bû Wezîrê Karên Hundir Suleyman Soylu daxuyanî da û got: "Ew mirov alîkariyê bi terorê re dike."
TÎMÊN TAYBET GELEK MAL XERA KIRIN Û SEWAL KUŞTIN
Piştî qedexe bi dawî bû heyeta ku ji nûnerên KCD, TJA, HDP û DBP'ê pêk dihat çûn li gund lêkolîn kirin û dîtin ku gelek mal hatine şewitandin û xerakirin. Dîsa gelek sewal hatine kuştin. Heyeta ÎHD'ê jî piştî lêkolînan rapor amade kir.