AMED – Yekîneyên xerakirinê li Taxa Lalebey a Sûrê li gel ku biryara xirakirinê tuneye jî, xwestin malekê xirab bikin. Xwediyê malê bertek nîşan da û got: “Ez ji mala xwe dernakevim, kerembikin bi serê min de xirab bikin” û deriyê malê ser xwe girt. Ekîbên xirakirinê, paşve gav avêtin û xirakirina malê rawestandin.

Wêrankirina Taxên Lalebey û Alîpaşa yên navçeyên Sûra Amedê ku di bin navê “Veguherîna Bajarvaniye" de, didomin. Malên ku der barê wan de biryara xerakirinê hatibûn dayîn tev hatin xerakirin. Niha jî êdî malên ku biryara xerakirina wan tune jî tên xerakirin. Yekîneyên xerakirinê bi darê zorê diçin ber malan û dixwazin xaniyên wan xera bikin. Di vê çarçoveyê de malek hat xirakirin û maleke din jî, ji ber berxwedana malbetê de nehat xerakirin. Rayedarên dewletê ku li taxê av û ceyran birîn, ji bo gel ceza bikin şebekeya avê ya Kolana Melîk Ahmet jî birîn.

‘XANIYÊN BIRYAR SER WAN TUNEYÎ JÎ XERAB DIKIN’

Mala Melek Ayata ya Kolana Sîmar a Taxa Lalebey li gel ku biryara xirakirinê li ser tuneye, dixwazin xirab bikin. Bi sedan polîsên sivîl û hêzên çevîk ku hatin taxê, malbatê derî li ser xwe girt û wiha got: “Hûn xanî di serê me de xirab bikîn jî em dernakevin.” Li ser berteka malbatê polîs neçar man gav paş biavêjin. Ayata diyar kir ku di encama xirakirina malan de, xaniyê wan jî zirar dîtiye û paceyên malê şikiyan e. Ayata da zanîn polîsan dinava saetekê de xisara malê ji navê hilanîn e.

‘BERXWEDANÊ GAV PAŞ VE AVÊT’

Ayata di dema xirakirinê de nîqaşên xwe yên bi polîsan re wiha vegot: “Ji nişka ve bi sedan polîs ket mala. Gotin ‘We pereyê xwe girtiye. Demildest malê vale bikin. Em ê xirakirinê destpêbikin.’ Xebatkarên şaredariyê jî weke ku mala bavê wan be, bi rehetî xwestin alavan ji malê derbixînin. Dema min ev yek dît, min jî got ez ji malê dernakevim. Ger hûn baweriyê ewqas bixwe tînin, kerim bikin, mala min di serê min de xirab bikin û min derî li ser xwe girt.”

‘HEYA MIRINÊ JI SÛRÊ DERNAKEVIM’

Ayata dest nîşan kir ku ew ê bi tu awayî xaniyê xwe nede û wiha bi dawî kir: “Ger Serokkomar, Serokwezîr, Walî û qeymeqam jî bên, ez xaniyê xwe nadim. Dayik û bavê min di vê malê de ji dayik û mezin bû û mirin. Kepçe kevirekê vê vî xanî jî bixwe erdê, dê li hemberî xwe min bibîne. Ger li serê min jî bixwin, min bikujin jî ez ji Sûrê dernakevim. Ji bilî canê min tişteke din tuneye. Edaleta dewletê hilweşe.”