EDENE - Malbata Zehra Orûç ku li Sûrê jiyana xwe ji dest da, doza cenazeyê keça xwe dike û ji bo vê yekê tim serî li muduriyeta polîsan û dozgeriyê dide. Dayik Bezo Orûç wiha got: "Ne wêneyê keça xwe, dixwazim gora keça xwe himbêz bikim."
Cenazeyê endama YPS-JIN'ê Zehra Oruç (Tamara Şîlan Sîpan) ku di dema qedexeya li Sûra Amedê de di Adara 2016'an de jiyana xwe ji dest dabû, nadin malbata wê. Dayik Bezo Orûç, ji bo cenazeyê keça xwe wergire gelek caran serî li Serdozgeriya Komarê ya Amedê û Muduriyeta Polîsan a Amedê daye, lê belê tu encam wernegertine.
POLÎS: BILA KEÇA TE BIMIRE?
Orûç, diyar kir ku piştî operasyonên li Sûrê bi dawî bûn, wê di Tebaxa 2016'an de bihîstiye ku keça wê jiyana xwe ji dest daye û li ser vê ew çûye Muduriyeta Polîsan a Amedê û li aqûbeta keça xwe pirsiye. Orûç, got ku li muduriyeta polîsan tam 8 saetan hatiye lêpirsînkirin. Dayik Orûç wiha axivî: "Li muduriyeta polîsan, polîsan hin wêne nîşanî min dan. Wêneyên ku min li wan nihêrî, ne yên keça min bûn. Polîsa ji min re gotin 'Cenazeyê keça te ya li Meletiyê an li Xarpêtê an jî li Dîlokê ye.' Piştî çend saetan şûnde min wêneyê keça xwe nîşanî wan da û ji min re gotin 'Ev kes nemiriye. Heke em ji te re kesê/a ku keça te biriye serê çiyê bibêjin tu yê çi bikî? Bila keça te bimire an sax bê zevtkirin?' Min jî ji wan re got 'Bila ne bi saxî û ne jî bi awayekî mirî bê zevtkirin. Dema sax bê zevtkirin em dizanin hûn ê çi bikin.' Paşê min nimûneya xwînê da û vegeriyam Edeneyê."
Orûç, got ku salekê hayê wê jê tune bûye ka keça wê sax e yan na û di Hezîrana sala çûyîn de hatiye ragihandin ku keça wê jiyana xwe ji desta daye. Orûç, anî ziman ku ji bo wergirtina cenaze wê serî li Muduriyeta Polîsan a Amedê û Serdozgeriya Komarê ya Amedê daye û wiha axivî: "Tam sê hefteyan em û parêzerên xwe çûn dozgerî û muduriyeta polîsan. Em çûn cem dozger ji me re gotin 'biçin muduriyeta polîsan û nimûneya xwîn bidin.' Paşê em çûn muduriyeta polîsan û wan jî ji me re got 'We nimûneya xwînê daye. Lê dxwaznameya we ya serlêdanê winda ye. Biçin serî li dozgeriyê bidin.' Em dubare çûn dozgeriyê. Jixwe em dozger nabînin, em daxwaznameyê didin katibê wî. Me dîsa daxwazname da û ji me re gotin 'Biçin muduriyeta polîsan.' Ez jî li Amedê mam. Du roj şûnde ez çûm muduriyeta polîsan. Ji min re gotin 'We ji bo Liceyê serlêdan kiriye. Biçin ji dozger re bibêjin û ji bo Sûrê serî lê bidin.' Em çûn me dozger nedît. Me daxwaznameya ku me ji bo Sûrê amade kir da katibê wî."
Orûç, anî ziman ku tam ew 3 hefteyan di navbera muduriyeta polîsan û dozgeriyê de çûne hatine û li ser hewldana parêzeran wan hevdîtin eyar kiriye û wiha got: "Parêzer çû cem dozger. Dozger ji me re got 'Kesî agahî nedaye me. Hayê me ji vê rewşê tune ye. Biçin muduriyeta polîsan û nimûneya xwînê bidin.' Em rabûn û çûn muduriyat polîsan. Polîsan got 'Mînaka we ya xwînê heye. Em ê agahî bidin dozger.'"
Orûç, dest nîşan kir ku dozger wan şandiye muduriyeta polîsan, muduriyeta polîsan jî ew şandine dozgeriyê û êdî dozger careke din ew qebûl nekirine. Orûç, da zanîn ku parêzerên wan li hemû saziyên tiba edlî geriyane û li aqûbeta nimûneya xwînê pirsîne û wiha got: "Kesî jî negot 'nimûneya xwînê lir vir heye.' Polîsa bi zanebûnî nimûneya xwînê naşînin saziya tiba edlî. Niha nimûneya xwînê ya keça min li Muduriyeta Polîsan a Amedê hatiye rawestandin."
'JI HESTIYÊN WAN DITIRSIN'
Orûç, anî ziman ku wek wê bi dehan malbat di vê rewşê de ne û vê tişta ku dewlet tîne serê malbatan wek "zilmê" nirxand. Orûç wiha axivî: "Em cenazeyê xwe dixwazin. Em dixwazin gorek wan hebe. Ji bo çi nadin? Ji ber ku ji cenazeyan ditirsin nadin. Ji hestiyên zarokên me ditirsin. Bila ji Xwedê bitirsin ji Xwedê, em dayik in, em malbat in, em cenazeyê xwe dixwazin. Em aştiyê dixwazin. Em naxwazin kes bimire. Ne wêneyê keça xwe, dixwazim gora keça xwe himbêz bikim. Cenazeyê wê li kuderê be em dixwazin ji wir wergirin."