AMED – Xetereya jiyana nexweşê penceşêrê Ahmet Bayar ê ku duh ji girtîgehê tahliye bû didome. Bayar piştî hat berdan rakirin nexweşxaneyê û tê dermankirin. Bayar diyar kir ku girtina wî bêhiqûqî bû û wiha got: “Dema çûm girtîgehê dimeşiyam. Lê bi sandalyeya teker derketim. Berprisyar rayedarên ez avêtine girtîgehê ne.”

Nexweşê penceşêra pişikê Ahmet Bayar ê ku ji ber di 15’ê Sibata 2011’an de tevlî çalakiyeke protestoyê bûbû û bi hinceta “Ne endamê rêxistinê ye li ser navê rêxistinê sûc kiriye” doz lê hatibû vekirin û cezayê wî hatibû erêkirin, di 31’ê adara 2017’an de hatibû girtin. Ji ber rewşa tenduristiya Bayar giran bû malbata wî li ber Girtîgeha Tîpa D a Amedê dest bi çalakiya greva birçîbûnê kir. Li ser destpêkirina çalakiyê re Bayar hat tahliyekirin.

‘TEVÎ HER TIŞTÎ MIN LI BERXWE DA’

Bayar ji roja hat girtin heta niha rewşa wî her çû girantir bû û 5 meh li benda rapora ji Saziya Tiba Edlî bê sekini. Bayar ê ku piştî tahliyeyê rakirin Nexweşxaneya Perwerdehiyê û Lêkolînê ya Gazî Yaşargîla Amedê dermankirina wî didome. Bayar ê ku rewşa wî xedare derbarê zehmetiyên li girtîgehê û rewşa tenduristiya xwe de axivî.

Bayar ê ku di axaftina xwe zehmetiyan dikişîne û wiha got: “Tişta li min hat kirin bêhiqûqiyek herî mezin e. Ji roja min birin girtîgehê heta niha bêedaletî didomiya. Bêyî tu sucî min dîl girtin. Min tu sucek nekiribû. 2 sal e ez vê nexweşînê dikişinim. 5 meh e jî li girtîgehê gelek dijwar derbas bû. Li girtîgehê tu şertên baş tunebûn. Li gel ew qas min nexweşînek giran dikişand jî lê nedihatim dermankirin û xwarinek baş jî tune bû. Girtiyan alîkariya min dikir. Jixwe li girtîgehê binpêkirina mafê mirovan a herî giran diqewime. Li gel van şertan jî me li berxwe da. Li girtîgehê wek pergala leşkerî li hember tevdigeriyan. Lê em her tim li hember van pêkanîn û pergalê derketin.”

‘GIRTIYÊN NEXWEŞ NAYÊN DERMAN KIRIN’

Bayar da zanîn ku birina nexweşxanayê bi serê xwe îşkence ye û wiha got: “Gelek girtiyên nexweşîna giran ên mîna min hene, lê nayên derman kirin. Li girtîgehê, girtî di şertên giran de dimînin. Ez dixwazim hemû girtiyên nexweş bên berdan. Ez bi meşê çûm girtîgehê û li ser sandalyeyê vegeriyam malê. Berpirsiyarê vê yekê, yên ku ez xistim girtîgehê ne.”

‘DEWLET BERPIRSIYAR E’

Hevjîna Ahmet Bayar, Emîn Bayar jî diyar kir ku 2 salin bi nexwiyaşiya giran a hevjînê xwe re eleqedar dibe û wiha axivî: “Nêzî 5 mehan min ji rêveberiya girtîgehê û rayedaran xwest ku hevjînê min radyoterapî bibin e. Lê nehat derman kirin. Piştî birin girtîgehê enfeksiyon girt. Di 22’ê Tebaxê em çûn girtîgehê, rewşa wî pir xerab bû. Li dijî vê me li ber girtîgehê çalakî pêk anî. Her çiqas dereng be jî, hat berdan. Rewşa wî hîna giran û krîtîke. Berpirsîyarê vê dewlet e. Ev yek bi nexweşeke giran nayê kirin.”