COLEMÊRG – Li Zozanên Oledirî yên Colemêrgê welatiyên sewalkariyê dikin Şahiya Berxbirê li dar xistin û behsa çanda berxbiriyê kirin.

Welatiyên mezraya Kêrîser a gundê Dêzê ya bi ser navenda Colemêrgê ve li Zozanên Oledirî Şahiya Berxbirê li dar xistin. Welatiyên sewalkariyê dikin xizmên xwe yên derdorê vexwendin Şahiya Berxbirê. Tevahiya rojê li aliyekî xwarinan pijandin û li aliyekî jî mih û berx birîn. Ji mehên biharê yên ewil ve şivan li zozanan pezên gundiyan xwedî dikin û mehaneyên şivanan jî hat hesabkirin. Hin berx jî ji bo firotanê hatin bazarkirin. Mezinan li aliyekî kar û barên xwe kir û li aliyê din jî zarokan xwe di golên avê de şûştin.

EWIL DIŞON Û PIŞT RE DIBIRIN

Yek ji şêniyê zozanan Emîn Yîgît diyar kir ku bi salane ew vê kevneşopiyê didomînin û wiha got: “Dema berê herkes berxbiriyê dikirin. Lê îsal tenê me şahiya berxbirê li dar xist. Beriya birînê rojek mih û berx tên şûştin û pişt re jî birînê pêk tînin. Me berxbiriyê bi hevkarî pêk anî. Li gorî hiriyê hin kes nafiroşin û hin kes jî difiroşin. Hin welatî bi hiriya xwe mînder, doşek, balîf û lihêfan çêdikin. Ji hiriyê gore û gelek tiştên din jî tên çêkirin.”

‘BÛ WESÎLA EM BÊN BA HEV’

Bekîr Guler ê ku li ser vexwendinê ji Geverê hat Şahiya Berxbirê jî got ku şahî bûye wesîla ku hemû xizmên hev bên gel hev û kêfxweşiya xwe ya şahiyê vegot.

‘ZOZANÊN XWEŞ QEDEXEKIRÎ NE’

Lezgîn Yîgît jî destnîşan kir ku gelek zozan qedexekirî ne û wiha axivî: “Berê bi hezaran mih li vê herêmê dihatin çêrandin. Niha 500-600 mih hene. Li her maleke gund 300-400 serî kerî hebû. Lê niha 20-30 pez heye. Ji ber ku hemû zozanên xweş hatine qedexekirin. Kesê ku sewalan bikire û xwedî bike nemane. Ev der ji bo sewalkariyê bihûşte. Lê niha em nikarin tiştekî bikin.”

BIZMIKAN LI DEVÊ BERXAN DIXIN

Şefîk Yîgît jî da zanîn ku destpêka zozanan mih û berx ji hev cuda tên xwedîkirin û piştî berxbirê jî berxan ji şîr dikin. Yîgît anî ziman ku her çiqas hin berx dixwazin li dayikên xwe bimijin jî lê bizmikan li devê berxan dixin û mijandinê asteng dikin. Yîgît got ku piştî berx mijandinê jibîr dikin bizmikan ji devê berxa dikin.

ZILAM BERXBIRIYÊ Û JIN JÎ KEVANIYÊ DIKIN

Leyla Yîgît a ku bêrîvaniyê jî dike da zanîn ku ew ji mêvanên xwe re xwarinê amade dikin û wiha got: “Salê carek em vê şahiyê li dar dixin. Zilam berxbiriyê dikin û jin jî kevaniyê dikin.” Yîgît diyar kir ku ew li zozanan ji bo demsala zivistanê penêr û qeliyê jî çêdikin û ji ber ew li zozanan bêrîvaniyê û sewlakariyê dikin gelek bextewarin.

‘BERÊ HER TIŞT XWEŞTIR BÛ’

Ahmet Yîgît jî got ku ew 3 rojan berxbirê pêk tînin û şahiyên berxbirê û sewalkariya berê hin bêtir xweştir bû û xweziya xwe bi salên berê anî.