AMED - Parlamenterê HDP'ê yê Amedê Îmam Taşçier diyar kir ku yekitiya neteweyî ya kurd, rayeyeke hevbeş e, da zanîn ku xebatên ji sala 2013'an ve tên meşandin, serkeftî ne û wiha got: "Kurd gav bi gav berbi yekitiyê ve diçin."

Piştî banga Rêberê PKK'ê Abdullah Ocalan di Newroza 2013'an de kir, xebata ji bo Kongreya Neteweyî ya Kurd dest pê kir û xebat dewam dike. Kongreya Neteweyî ya Kurdistanê (KNK) demek berê li Silêmaniyê civînek li darxist û der barê kongreya neteweyî de nîqaşan ji nû ve dest pê kir. Parlamenterê Partiya Demokratîk a Gelan (HDP) Îmam Taşçier jî beşdarî civînê bû û der barê nîqaşên ku hatine pêşxistin de agahî da.

Taşçier destnîşan kir ku di sala 2009'an heta niha di çarçoveya yekitiya neteweyî de xebatên girîng tên meşandin, aşkera kir ku li ser banga Rêberê PKK'ê Abdullah Ocalan, Serokê Giştî yê PDK'ê Mesûd Barzanî û Serokê Giştî yê YNK'ê Celal Talabanî, di sala 2013'an de Konferansa Yekitiya Neteweyî li hev civiya ye. Taşçier da zanîn ku di aliyê polîtîkayên şer ên li dijî kurdan de hemû rêxistinên kurdan xwedî li yekitiya neteweyî derdikevin, xebatên di sala 2013'an de destpêkirin, bi hemû leza xwe dewam dikin.

‘DIVÊ KURD JI BO BERJEWENDIYÊN XWE BIXEBITIN’

Taşçier aşkera kir ku ji bo kongreya neteweyî kom bike, gevên girîng hatine avêtin û wiha axivî: "Heke me xebatên hêj bi hêztir bikira, kongreya neteweyî pêk baniya, dê DAIŞ'ê nikaribûya êrîşê Kurdistanê bikiriba. Sykes Picota ku bi sedan sal e kurdan perçe dike, hêzên emperyalîst naxwazin kurd bên gel hev. Xwestin kongreyê asteng bikin, lê ruxmî vê jî gelek xebatên serkeftî hatin kirin. Divê kurd bi hev re xebatên xwe bidomînin û di nav diyalogê de bin. Divê kurd ji bo berjewnediyên neteweyî tê bikoşin û vê yekê nîşanî hemû cîhanê bidin."

‘YEKITÎ JI BO KURDAN GELEK GIRÎNG E’

Taşçier anî ziman ku li ser banga KNK'ê ew di meha Tîrmehê de derbasî Herêma Federal a Kurdistanê bûne, piştî civînên der barê kongreya neteweyî de, gavên girîng hatine avêtin û wiha pê de çû: "Armanc teqes yekitiya neteweyî ye û hemû aliyên siyasî di vî warî de heman tiştî difikirin. Dê kurdên li çar parçeyên Kurdistanê û li dîasporayê, di platformên wiha de cih bigirin û nîqaşan bidin meşandin. Kesên tev li xala yekitiya neteweyî nebe, dê bên îqnakirin."

‘GAV BI GAV BER BI YEKITIYA NETEWEYÎ VE’

Taşçier cihên ku kurd îro hatinê wekî "Gav bi gav yekitiya kurdan ava dibe" pênase kir û wiha dirêjî da axaftina xwe: "Di çarçoveya mafên netewan de, divê gel bi xwe biryara xwe bidin û kurd jî wekî milet divê bixwe biryara xwe rêvebirinê bidin. Di vê der barê de gelek nîşaş hatin meşandin. Biryar hat girtin ku divê qadeke demokrasiyê bê avakirin û divê di warê siyasî de bikeve jiyanê û biryara vê hat girtin. Di vê çarçoveyê de ber bi yekitiyê ve diçe."

HEKE KURD YEK BÛNE...

Taşçier der barê astengiyên li hemberî Kongreya Neteweyî de jî agahî da û ev tişt anî ziman: "Gotineke kurdan a hev beş heye; heke kurd yek bûn. Her kurd behsa yekityê dike. Ev sed sal e yekitî tune. Ruxmî polîtîkayên perçekirinê jî kurd hata îro hatin. Her çar dewletên li welat, her yekê ji hêlekê ve kurdê xwe xuliqandin, ji hêla din ve kurd bê nasname hiştin. Li Rojava nasname nedan wan, li Tirkiyeyê bi cerdevantiyê gel helandin. Bi vê polîtîkayê yekitiya kurdan asteng kirin. Ji bo ev astengî ji holê rabin, divê kurd xwedî li çand, ziman, kevneşopî û hebûna xwe derkevin."