AMED - Amedspor a ku di ber bi şampiyonayê ve diçe, ji be tengasiyên madî kampanyaya piştevaniyê da destpêkirin. Serokê Lijneya Rêveber a Amedsporê Nurullah Edemen ji bo piştevaniyê bang li her kesî kir û wiha got: "Em ê bi piştevaniya gel bibin şampiyon."

Amedspor a di Koma Spî ya Lîga 2'yemşn a Spor Totoyê de ji bo rêza yekemîn têdikoşe, ji ber pirsgirêkên aborî kampanyaya piştevaniyê da destpêkirin. Serokê Lijneya Rêveber a Amedsporê Nurullah Edemen têkildarî kampanyaya piştevaniyê axivî. Edemen, dest nîşan kir ku dê tîma wan bi piştevaniya gel li ber xwe bide.

Edemen, anî ziman ku li gel êrîş û çewisandinan, Amedspor ji ber prisgirêkên aborî berê xwe daye gel û got, bêyî sazî û dezgehek alîkariya wan bike ew li ser piya disekinin. Edemen, diyar kir ku piştî pirsgirêkên aborî zêde bûn wan ji bo piştevaniyê biryara daye ku berê xwe bidin gel û wiha axivî: "Di futbolê de serkeftina me ya heta niha, bi rastî jî ji ber hevgirtinê ye. Hevalên me yên lîstikvan bi dozê, têkoşîn şampiyonyê bawer dikin. Em bi saya vê yekîtî û baweriyê hatin roja îroyîn. Înşeleh dê ji niha û pê ve jî ev bawerî me ber bi şampiyoniyê ve bibe. Em ê bi piştevaniya gel ber bi şampiyonayê ve biçin."

Edemen, dest nîşan kir ku pirgsirêkên aborî fealiyetên sporê asteng nakin, dê Amedspor li gel hemû neyîniyan jî têkoşîna xwe ya sporê bidomîne û wiha axivî: "Di 2 salên dawî de em rastî pirgsirêkên cuda û êrîşan hatin. Yanî dibe ji niha û pê ve jî ev hebin. Lê belê, dîsa jî em ê spora xwe bidomînin."

BANGA PIŞTEVANIYÊ

Edemen, anî ziman ku Amedspor tîmeke ku bi gel re bûye yekpare û wiha banga piştevaniyê li dildarên Amedsporê û her kesî kir: "Amedspor, tîma gel e. Ne aîdî tu saziyekê ye, ne aîdî girseyekê yan jî nêrîneke siyasî ye. Qulûbeke sporê ya ku navê bajarê me lê ye. Divê tîma gel bi piştevaniya gel xurt bibe. Dîsa me berê xwe da gelê xwe."