EDENE - Komên alîgiran ên li ser medyaya civakî xwe birêxistin dikin, bi hastaga "#ÖzgürTribünlerİçinHAYIR" (#JiBo TrîbunênAzadNA) kampanya dan destpêkirin û diyar kirin ku, ew li dijî endustrîbûna futbolê, ji bo demokrasî û aştiyê dibêjin "Na".

Ji bo referandûma 16'ê Nîsanê, gelek derdorên civakê tercîhên xwe diyar dikin. Komên alîgiran ên li ser civaka medyayî xwe birêxistin dikin, bi hastaga "#ÖzgürTribünlerİçinHAYIR" (#JiBo TrîbunênAzadNA) kampanya dan destpêkirin. Koma alîgiran a Kaplanpenche ya di nav Adanasporê de xwe birêxistin kirin, diyar kir ku ew ê di referandûmê de bibêjin "Na".

‘LI DIJÎ ENDUSTRÎBÛNA FUTBOLÊ 'NA''

Ji endamên komê Ferhat Çelikal, anî ziman ku piştî şîrovkarê futbolê Ridvan Dilmen kampanyaya "Erê" dest pê kiriye, wan jî xwestiye li dijî vê bi hastaga "#ÖzgürTribünlerİçinHAYIR" (#JiBo TrîbunênAzadNA) kampanyeyekê bidin destpêkirin. Çelikal wiha got: "Bi endustrîbûna futbolê, futbol daxilî qada siyasetê bûye. Îktîdarên siyasî ji bo potansiyela dengên xwe zêde bikin û ranteke siyasî bi dest bixin, futbolê her tim wek navgîneke propagandayê bi kar tînin."

Çelikal, anî ziman ku di têkoşîna îktîdarên siyasî de futbol her tim wek malzemeyek reklamê tê bikaranîn û wiha axivî: "Wek trîbunvanên ku li dijî endustrîbûna futbolê ne, em ê di referandûmê de dengê 'Na'yê bi kar bînin. Em ê li dijî rejîma yekzilamî bibêjin 'Na'."

'DÊ 'NA' BIBE SERÎHILDANEK'

Endamê civata koma Herêma 6'emîn a Adana Demirsporê Sergen Şimşek ê got 'Em ê ji serokdewletiyê re bibêjin 'Na'" wiha axivî: "Em civateke alîgiran a sosyalîst in. Baweriya me ew e ku divê li dijî pergala serokdewletiyê demokrasî bê parastin. Gotina 'Na'yê tenê ne ji bo pêvajoya referandûmê, dê piştî vê pêvajoyê jî bibe serîhildanek."

'EM Ê DENGÊ XWE BILINTIR BIKIN'

Şimşek, ragihand ku îktîdara siyasî trîbunan bi taktîka dabeşkirin û perçekirinê ji hev cuda dike û wiha axivî: "Trîbunên ku dawiya hefteyan tije ne, ji bo wan bûye cihê kampanyayên hilbijartinê. Ji ber vê dê li hemû eniyên trîbunan ne ji bo serketina patronan ji bo ya karkeran tezahurat her bidomin. Em ê di dawiya her besteyê de dengê xwe bilintir bikin. Em ê îro li dijî pergala serokdewletiyê demokrasiyê biparêzin. Em ê ji bo aştî û demokrasiyê bibêjin 'Na'."