ÊLIH - Tîma Futbolê ya Mêran a 1955 Batmansporê di maça fînalê de 2-1 Batman Tupraşsporê têk bir û di komê de ma.

Di Lîga Amatorê de Tîma Futbolê ya Mêran a 1955 Batmanspor a ku piştî qeyûm tayînî Şaredariya Êlihê hat kirin û diyar kir ku ew ê wek tîma gel riya xwe bidomîne, li Stadyûma 16'ê Gulanê bi Batman Tupraşsporê re lîst. Di maça fînalê ya ji bo mayîna di komê de, Tîma Futbolê ya Mêran a 1955 Batmanspor 2-1 Batman Tupraşsporê têk bir û di komê de ma.

Li gel rêveberên HDP, DBP'î, Hevşaredarê Êlihê Sabri Ozdemir û lîstikvanên Tîma Futbolê ya Jinan a 1955 Batmansporê, gelek welatî maç temaşe kirin. Di dema xwe ya asayî de maç 1-1 bi dawî bû. Lê di deqîqeya 94'an a dema pêvekî de 1955 Batmanspor golek avêt û 2-1 ket pêşiya Batman Tupraşsporê. Piştî gola duyemşn, lîstikvanekî Tupraşsporê bi pehîn û kulamn bi ser hakemê nêv qadê ve çû û ji ber vê hakem birîndar bû û ew rakirin nexweşxaneyê. Li ser vê TFF maçê rawestand û biryara taloqkirina maçê da. Lê piştî kêliyekê rayedarên federasyonê biryara xwe guherandin û daxuyandin ku 1955 Batmanspor maç qezenc kiriye.

Piştî maçê, alîgirên 1955 Batmansporê li qadê pîrozbahiya serketinê kirin. Her wiha paşê lîstikvanên tîmê û alîgirên wê li lokala HDP'a Êlihê bi dirûşmeyên "Na" û gerandina govendê pîrozbahiyên serketinê domandin.