AMED - Hunermend Azad Bedran ji bo piştgiriya Amedsporê strana bi navê “Eşq Amedspor e” çêkir û bang li her kesî kir ku xwedî li tîma Amedsporê derkevin.
Tîma futbolê ya Amedsporê ji bo rewşa wan a aborî bê başkirin kampanya piştgiriyê dabûn destpêkirin. Piştî destpêkirina kampanyayê ji her aliyê û eniyê piştgirî tê dayîn. Ji bo tîma Amedspor di aliyê aboriyê de rewşa wê baş bibe, hunermendê Navenda Çanda Dîcle û Firat a ku bi riya KHK’ê hat girtin Azad Bedran, ji bo tîmê strana bi navê “Eşq Amedspor e” da çêkirin û wek klîp hat amadekirin. Bedran stranê bi alîkariya Simay Production, OCTO Medya Production û Amedspor amade kir. Gotinên stranê ji aliyê Dr. Ilyas Yucel hatiye nivîsandin û muzîka stranê jî ji ber strana “Lê Amedê” ya Hozan Şemdîn hatiye girtin. Stran hezkiriyê Amedsporê dicoşîne û balê dikişîne ser xwe.
‘EV TÎM A GEL Û BAJAR E’
Bedran diyar kir ku ji bo piştgiriya kampanya Amedsporê serî li xebatek wisa daye û wiha got: “Piştgiriya herî mezin Şaredariya Bajarê Mezin a Amedê dida tîma Amedsporê. Ji ber ku ev tîm a gel û ya bajêr e. Qeyûmê Şaredariya Bajarê Mezin a Amedê rabû ku ji ber desteka aborî nav biguherî ne. Lê kuluba tîmê li hember vê derket û nehişt. Bi awayekî xwezayî di aliyê aborî de ketin nav tengasiyan. Piştî wê ji bo tîmê kampanya piştgiriyê hat destpêkirin. Min jî wek hunermendekî xwest bi çêkirina klîba stranekî piştgiriya xwe bidim nîşandan.”
‘EM Ê BI KEDA GELÊ XWE BISERKEVIN’
Bedran destnîşan kir ku alîkariya wî her çiqas biçûk be jî lê bi vê stranê piştgiriya xwe bide aşkerekirin û wiha axivî: “Di heman demê de me xwest em bi vê stranê raya giştî û civakê hişmend û agahdar bikin. Me wek sê saziya em hatin cem hev û me biryara çêkirina klîbê da. Klîb li ser medya civakî hat weşandin. Hindek be jî hinek hestiyarî çêbû. Armanca me ew e ku em hin bêtir vê kampanyayê mezin bikin û bidin belavkirin. Xwedî derketina tîma bajêr xwedî derketina bajêr e. Heke ev kampanya berfireh bibe wê bê xuyakirin ku em muhtacî tu kesî nîn in. Em bi keda gelê xwe hatin heta îro û em ê ji îro şûn ve jî wisa bidome. Me xwest em bi klîbê peyamek bidin raya giştî û civakê.”
Bedran di dawiya axaftina xwe de bang li hemû ciwanên Amedê, dildarên Amedsporê, gel, hunermend û raya giştî kir ku xwedî li Amedsporê derbikevin û xwest herkes piştgiriya xwe bide nîşandan.
Bilal Guldem -dihaber