AMED - Xwendekara Fakulteya Tipê ya Zanîngeha Dîcleyê Dîlan Kaya ku di heman demê de Lîstikvana Tîma Futbolê ya Jinan a Amedsporê ye anî ziman ku çi dibe bila bibe, dest ji xeyalên xwe bernedin.


Dîlan Kaya yek ji lîstîkvana nava saheya Tîma Futbolê ya Jinan a Amedsporê û di heman demê de xwendekara Fakulteya Tipê ay Zanîngeha Dîcleyê ye. Kaya hîna di zarokatiya xwe de li koçeyan bi hevalên xwe re dest bi lîstika futbolê kir û ev heskirina wê ew gihand asta profesyoneltiyê. Kaya 20 saliye û 7 salin bi topê dilîze.

'BI BERXWEDANÊ QEZENC KIR’

Kaya dest nîşan ku wê di 14 saliya xwe de di tîma dibistanê de dest bi lîstika futbolê kiriye û wiha axivî: "Dure ketim Qulûbeya Sporê ya Şaredariya Başajarê mezin a Amedê û pişt re derbasî Amedsporê bûm. Malbat û civaka derdo ji min re tim digotin "Jin bi futbolê nalîzin, ev karê zilamane. Lê li gel hemû hewldan û zoriyan min dev ji futbolê berneda. Ji ber vê berxwedan, niha piştgiriya herî mezin ez ji malbata xwe digirim."


Kaya diyar ku civak û malbat necare ku daxwazên jinan qebûl bikin û wiha got: "Di futbolê de min gelek qezenc bi dest xistin. Hestên ku ez niha nikarim wan binim ser ziman min jiyan. Bi şev û roj ji bo lîstikê hewldan didin. Keda gelek kesan heye. Em necarin ku bi wê berpirsiyartiyê tevbigerin. Her gola ku em diavêjin hestên pir xweşik di me de dide jiyîn.

DI HEMAN DEMÊ DE DIXWÎNE

Kaya da zanîn ku ew têkoşîna xwe ya futbol û xwendekariyê bi hev re dide û wiha bi lêv kir: "Weke ku hez ji futbolê dikim, hez ji xwendinê jî dikim. Li gel hemû zor û zehmetiyan ez pir keyfxweş û bextewarim. Ji ber ku min ev xeyalên xwe pêk tînim. " Kaya bal kişand ser êrîş û pêkanînên li ser Amedsporê û wiha dawî li axaftina xwe anî: "Navê Amedsporê têra xwe heye. Li her qadê alîgirên wê hene û ji aliyê gel ve jî tê heskirin. Li gel hemû zordariyan dê Amedspor bi bin nekeve. Ev çendeke vê herêmê ye. Ez bang li hemû jinên ku ji ber zextên malbat û derdorê nikarin daxwazên xwe pêk bînin dikim ku çi dibe bila bibe dest ji xeyalên xwe bernedin. Mirov bi xeyalên dijî. Ger hûn hez ji tiştekê dikin û dixwazin, pêk bînin. Ger hûn van daxwazên xwe pêk neyînin, hûnê ne keyfxweş bin. Heya ku em dijîn pêwîste ku em keyfxweş bin."