ROJANE

*Walîtiya Stenbolê der barê polîsên ku di dema bûyerên Geziyê de bi şidetê bi ser çalakvanan çûbûn de biryara "destûrnedana lêpirsînê" dabû. Dadgeha Îdarî ya Herêmê vê biryara Walîtiya Stenbolê xera kir. Lê belê dozgeriyê jî ji dêvla lêpirsînê biryara "neşopandinê" da û dosyeyê şand "Buroya Sûcên Kiryar Nediyar".

*Mistefa Mihemmed Elî yê kobaniyî ku ev 10 meh in li Girtîgeha Tîpa F a Kurkçuler a Edeneyê di hucreyeke yekkesî de tê ragirtin wiha got: "Ne malbata min dikare bê serdana min û ne jî dikarim hevalên xwe bibînim. Ev şert zehmet in û dixwazin bi saxî mirovan bikujin. Tenê radyoyek min heye, wekî din tu tiştek min tune ye."

*Gundê Merxo ku girêdayî navenda Dersimê ye, di salên 90'î de hatibû şewitandin û ev 3 sal in ku malbat dubare vegeriyanê. Lê belê piştî ku kesên li gund hatin binçavkirin, careke din gund hat valakirin. Ji bilî bizin û mirîşkan tu giyanewer li gund tune ne.

*Li Dêrikê 17 meh berê hevşaredar û xebatkarên şaredariyê jî di nav de 33 siyasetmedar hatin girtin. Hîn jî îdianemaya wan nehatiye amadekirin. Her wiha dosyeya lêpirsînê ya ji aliyê dozgeriya navçeyê ve hat amadekirin jî, du caran bi hinceta "delîlên kêm" ji aliyê Serdozgeriya Komarê ya Mêrdînê ve bi paş ve hat şandin.

*Operasyonên leşkerî yên li Şirnexê bi mehane didomin. Di çarçoveya van operasyonan de ji bor topbarana qereqolên li hawirdorê li herêmên Cûdî û Gabarê şewat derketin. Şewata ku derket bi rojane didome.

*Nobeta Wijdan û Edaletê ya li Parka Aştiyê ya Mûsa Anter a Wanê hat destpêkirin, di roja duyemîn de didome. (11.00)

* Çalakiya kedkarên li Kolana Yukselê ku dixwazin li karê xwe vegerin dê di roja 274'an de bidome. (13.30-18.00)

* 2'emin Rûniştina doza Rojnameger Nedîm Turfent dê li 2'emîn Dadgeha Cezayên Giran a Colemêrgê bê dîtin.

JÎNGEHA KEDÊ

*Şaredariya Bajarê Mezin a Îzmîrê, di 3 mehên dawî de zêdeyî 120 karker ji kar avêtin. Karkeran dest nîşan kir ku ew ê li hemberî vê neheqiyê bêdeng nemînin û wiha axivîn: "Heke bivê em ê dest bi greva birçîbûnê bikin, konan vedin. Ya girîng ne ew e ku ka li wir çend demsal derbas bûne. Heta em dubare vegerin ser karê xwe em ê li ber xwe bidin."

ABORÎ

*Serevanên bajaroka Kazanliyê anîn ziman ku serevanî ketiye nav lepên banka û selefxuran û wiha gotin: "Me her sal digot 'bihareke din', lê êdî ne em dikarin deynê komîsyonvanan, ne yê selefxuran û ne jî yên bankeyan bidin. Ji bo cotkaran serevanî qediyaye."

ÇAND Û HUNER

*Esnaf Cevît Satici ku bi salane li Sûka sifirkeriyan merş, mahfûr, tej û berkan ji gundan dikire û difiroşe, diyar kir ku ev kar û pîşe ji bo wî weke evînekê ye û wiha got: "Ez bi hezkirinî vê çandê diparêzim. Neyên kirîn û firotin jî dîsa ez ê vî karî berdewam bikim û biparêzim.

*Pirtûka Robert P. Millon a bi navê Zapata/Li Meksîkayê Şoreşa Gundiyan ji aliyê Weşanxaneya Amarayê ve hat çapkirin.