AMED - Amediyan li hemberî pêşnûmaya ku rayeya marbirînê dide miftîtiyan bertek nîşan dan.

Pêşnûmaya ku rayeya marbirînê dide miftîtiyan, ji aliyê hikûmeta AKP'ê ve berpêşî Serokatiya Meclîsê hat kirin. Amedî îtiraza xwe ya ji bo vê pêşnûmayê anîn ziman. Dîlan Ayusa 22 salî, diyar kir ku ev qanûn mêran diparêze û ew bi tu awayî vê pêşnûmayê qebûl nakin. Ayus wiha got: "Ji ber vê pêşnûmayê dê zarok bên îstismarkirin, dê bi rê û rêbazên berê bê xwestin ku ser wê bê girtin. Dê li hemberî vê yekê qanûn xwe li nedîtiyê deyne. Ma ez ê çawa ji vê yekê re bibêjim temam. Ev yek nayê qebûlkirin."

‘ÎSTÎSMARKARAN DIPARÊZE'

Xwendekara zanîngehê Duçem Guler jî, anî ziman ku ev pêşnûma tê wateya binpêkirina mafên jinan û dê rê li ber îstismarkaran vebike ku bi rihetî tevbigerin. Guler, diyar kir ku ev pêşnûma bi temamî binpêkirina jinan esas digire û wiha domand: "Wisa bawer dikim ku marbirîna miftîtiyan dê di warê jinan de gelek neyîniyan bi xwe re bîne. Ev hewldaneke li hemberî sînordarkirina mafên jinan. Bi vê yekê tê xwestin ku wek berê jinan têxin bin nîrê mir. Ev pêşnûma xizmeta mêr dike û em qethiyen qebûl nakin."

LI DIJÎ MÊRAN E JÎ

Tenê ne jin, mêr jî li hemberî vê pêşnûmayê bertek nîşan didin. Welatiyê bi navê Îbrahîm Canpolat anî ziman ku, li hemberî jinê tu carî aqilê dewletê neguheriye û wiha got: "Ev pêşnûma rê li ber pirzewaciyê vedike, rê li ber zewaca zarokên biçûk vedike. Ev bîrdoziya dewletê ye."

Mehmet Esen jî, dest nîşan kir ku ev pêşnûma tenê ne li dijî jinê, di şexsê jinê de li dijî hemû civakê ye û armanca wê ew e ku civakê bike kole. Esen wiha axivî: "Bi vê pêşnûmayê tê xwestin ku bi temamî vîna jinê ji holê bê rakirin û bi destê mêr feraseteke yektîpî bibe serwer. Mînak, dê du kes bizewicin lê dê li vir mafê gotinê yê jinê tune be. Yanî dê xwediyê gotinê mêr be. Yanî bi ya min ne hewceye saziyeke dînî di warê zewacê de bibe xwedî biryar. Wek ferdekî vî welatî ez vê pêşnûmayê qebûl nakim."