STENBOL - TJA, îro starta kampanyaya "Dê Tecrîd Winda Bike, Azadî Bi Ser Keve" bide. Gulsun Biter a di Komîsyona Koordînasyona kampanyayê de cih digire got: "Jin dê tecrîdê birûxînin û em ê azadiya xwe bi dest bixin. Em bang li hemû jinan dikin ku li kampanyayê xwedî derkevin."

Tevgerê Jinên Azad (TJA) di civîna xwe ya 11-12'ê Hezîranê de biryara kampanyaya "Dê Tecrîd Winda Bike, Azadî Bi Ser Bikeve" da. Dê îro saet di 14.00'an de li avahiya HDP'ê ya Bajêr bi daxuyandina deklarasiyonekê starta kampanyayê bê dayîn. Dê kampanya di 25'ê Mijdarê Roja Têkoşîna li Dijî Şidetê ya li Hemberî Jinê bi dawî bibe.

GELEK RÊXISTINÊN JINAN PIŞTEVANIYA KAMPANYAYÊ DIKIN

Dê kampanya bi qasî 4 mehan bidome û dê di vê pêvajoyê de jin li malan civînên jinan çêbikin, konferans, panel, gotûbêj û şahiyan li dar bixin û her wiha ji bo balê bikêşin tecrîda li ser Rêberê PKK'ê Abdullah Ocalan dê gelek xebat bên kirin. Tevî meclîsên jinan ên HDP û HDK'ê gelek rêxistinên jinan û avaniyên siyasî piştevaniya vê kampanyayê dikin.

Gulsun Biter ku di Komîsyona Koordînasyonê ya kampanyayê de cih digire der barê xebatên di çarçoveya kampanyayê û naveroka kampanyayê de axivî.

Biter, diyar kir ku bi Rewşa Awarte (OHAL) re her ku diçe zext û zoriyên li ser gelê kurd û jinan zêde dibin û ev tişt gotin: "Em jî di serî de ji bo hevrêyên xwe yên girtî û Rêberê Gelê Kurd Abdullah Ocalan di bin navê dengderxistinê, dijderketinê em kampanyayekê didin destpêkirin. Dê ev xebata me heta 25'ê Mijdarê bidome. Em bi dirûşmeya 'Dê Tecrîd Winda Bike, Azadî Bi Ser Bikeve' kampanyayê didin destpêkirin. Di vê çarçoveyê de em ê li qadên ku em lê ne deng derxînin, hêzê bidin hevdu û bitêkoşin. Ji ber vê yekê em starta kampanyeyek wisa didin."

‘EM Ê GIRANIYÊ BIDIN SER XEBATÊN JINAN'

Biter, diyar kir ku di demên dawî de her ku diçe şidet, zext û zorî, êrîşên fizîkî û zayendî yên li hemberî jinan zêde dibin. Biter got ku ji ber vê yekê ew ê di çarçoveya vê kampanyayê de giraniyê bidin ser xebatên jinan.

‘DÊ JIN TECRÎDÊ BIRÛXÎNIN'

Biter, anî ziman ku yek ji lingê kampanyayê jî azadî ye û lingê wê yê herî girîng jî şikandina tecrîda li ser Rêberê PKK'ê Abdullah Ocalan e. Biter di berdewamiya axaftina xwe de ev tişt gotin: "Dê jin tecrîdê birûxînin û em ê azadiya xwe bi dest bixin. Em jin vê yekê baş dizanin a ku me anî vê rojê û bû sedem ku em di vê têkoşînê de cih bigirin ruh û hêza ku Rêberê Gelê Kurd Abdullah Ocalan da me bi xwe ye. Ji ber vê em ê heta dawiyê xwedî li vê têkoşînê derkevin. Em ê bibin pêşengê vê yekê, heta em bi ser kevin. Li dijî vê derhuqûqiyê û rawestandina vê tecrîdê kî li cem me cih bigire ew xwedî li mirovahiyê derdikeve. Tecrîd sepandineke der mirovahiyî ye û her kesê dibê ez mirov im divê li dijî vê yekê derkeve û dengê xwe li dengê me zêde bike."

BANGA XWEDÎDERKETINA LI KAMPANYAYÊ

Herî dawî Biter banga xwedîderketina li kampanyayê li hemû jinan kir û wiha got: "Pir hindik maye ku em bigihêjin azadiya xwe. Em çi qas zêde bixebitin wê ewqas nêztir be. Heta em bi dest bixin em ê bitêkoşin."